Kryetarja e LSI-së, Monika Kryemadhi i është përgjigjur nga Bradasheshi kryeministrit Rama, i cili nga foltorja e Kuvendit tha se Qeveria po punon në lidhje me taksën për Rrugën e Kukësit, duke treguar kështu një tërheqje nga tarifat e publikuara më herët. Nga Bradasheshi ku opozita po vijon protestën, Kryemadhi tha se ky është një teatër i kryeministrit.
Ajo tha se nëse Rama po tregon një tërheqje nga situata që shkaktuan tarifat e larta, atëherë le t’i lirojë qytetarët kuksianë të arrestuar prej 5 ditësh.
“Ky është teatër i Ramës. E kemi parë të qajë kështu disa herë. Sa herë që është në hall thotë gjëra të tillë. Përderisa ai u tërheqka nga taksa në Rrugën e Kombit, pse nuk liron qytetarët kuksianë? Ai është një person i tillë që kur është në hall të bëhet urë, por kur rikthehet aty ku do rifillon me arrogancën. I kërkojmë Prokurorisë që të hetojë kontratën me koncesionarin. Rama është aq shumë i zhytur në zullumet e tij sa nuk ka prokuror që e shpëton. Protestat janë të qytetarëve, ne jemi këtu për t’i mbështetur dhe për të qenë pranë tyre. Nuk do ndalemi derisa Rama të tërhiqet, dhe të plotësohen kërkesat tona”, tha Kryemadhi.
Ndërkaq, kryetarja e LSI ka përmendur edhe kërkesat kryesore të protestuesve drejtuar kryeministrit Rama.
“Përshëndes qytetarët për të gjithë këtë reagim qytetar që është i domosdoshëm dhe ndikon kaq shumë për herë të parë në gjithë këtë periudhë, qeveritë duhet të kenë frikë nga populli, dhe populli nga qeveritë. Kjo na bën ne të gjithëve na bën të reagojmë, dhe të dëgjojmë zërin e qytetarëve. Sot njerëzit ndihen më të çliruar për shkak të protestës së tyre, por kjo nuk do të thotë se mbaron këtu. Kërkesat tona dhe të qytetarëve vijojmë. Ajo çfarë ka rëndësi sot është të lirohen qytetarët kuksianë që ndodhen në burg, heqja e taksës në rrugën e kombit, rikthimi i familjeve në skemën e ndihmës ekonomike, ulja e çmimit të ujit. Këto janë kërkesa që ofrojnë një mundësi dhe çlirim për të mbijetuar”, tha Kryemadhi.
Sakaq, një tjetër ambulancë i ka ndërprerë fjalën kryetares së LSI, pasi një i sëmurë nga Grmashi ka kërkuar transportimin për në Tiranë.
