Olsi Rama, drejtori i Partizanit, është prononcuar sot për mediat, që ishin të pranishme në seancën stërvitore të të kuqve. Interesi ka qenë për situatën e trajnerit Starova, që mund të pezullohet nga Disiplina pas përplasjes me gjyqtarët në Vlorë, lakimin e një austriaku për stolin e “demave”, si dhe zërat e fundit mbi një largim të Realdo Filit: “Kemi pësuar një humbje në Vlorë si rezultat i një 11-metërshi të akorduar në minutën e fundit të kohës shtesë. Mendoj se në përballjen e luajtur ndaj Flamurtarit, ekipi i ka zbatuar mjaft mirë detyrat taktike të dhëna nga trajneri. Në këtë fazë ku jemi, për ne është mjaft e rëndësishmë që skuadra të bëjë paraqitje të tilla, për më tëpër që ndaj Flamurtarit nuk kishim në dispozicion disa prej lojtarëve të afruar gjatë merkatos së janarit.
Merkatoja e dimrit? Mund ta konsideroj të mbyllur. Jemi mjaft të kënaqur me elementët që kemi afruar në ekip. Kemi rritur cilësitë teknike e fizike të skuadrës dhe mendoj se kemi goditur aty ku ishte i nevojshëm përforcimi i Partizanit. Çështja “Fili”? Eshtë pozitive kur në ekip ka konkurencë. Fili është lojtar i Partizanit. Ne prej disa kohësh kemi diskutuar edhe me menaxherin e tij mbi mundësitë që lojtari të ketë për të luajtur, pasi ka nevojë të aktivizohet, duhet të fitojë besimin në aftësitë e tij. Ne e kemi konsideruar pjesë të Partizanit, prandaj kemi sugjeruar edhe një formë huazimi, që të kishim mundësi ta shikonim potenticialin e lojtarit. Fili nuk është i larguar, kemi akoma për të biseduar.
Çështja është që te Partizani duhet të qëndrojnë vetëm lojtarët që kanë dëshirë të japin për skuadrën maksimumin e tyre. Besoj që fanella e Partizanit është e nderuar dhe e respektuar, ndaj e meriton që t’i kthehet në këtë mënyrë respekti. Ne kemi afruar lojtarë përgjatë merkatos së dimrit, normal që një lojtar si Fili ndihet disi në trysni, por është zgjedhja teknike e trajnerit se cilët lojtarë do të aktivizojë në fushë. Situata e Starovës? Lexova dhe unë disa lajme në gazeta, por nuk ka asgjë të vërtetë se një trajner austriak mund të vijë te Partizani”.