Kryeministri Edi Rama ka bërë një reagim të paparashikueshëm duke përdorur rrjetin e tij social “Facebook” për një kërkesë-ofertë për Opozitën në lidhje më zgjedhjen e kryeprokurorit të ri.
Në këtë postim Rama i ofron konkretisht kreut të Opozitës Lulzim Basha bashkëpunim duke iu drejtuar me pyetjen: “A mund të kemi një zgjidhje të përbashkët për Prokurorin e Përgjithshëm, si pikënisje të një Pakti Kombëtar për Europën që duam”.
Siç mund të kuptohet ky është një propozim i hapur kundrejt Opozitës, për të pasur një bashkëpunim, dhe konsensus për kryeprokurorin e ri. Zyrtarisht nesër i mbaron mandati kryeprokurorit aktual Adriatik Llalla.
Sakaq po të kujtojmë të enjten e kaluar Rama i ofroi bashkëpunim për kreun e KQZ-së Klement Zguri, duke i ofruar kështu mundësi zgjedhjeje për Opozitën.
Pra tani janë dy propozime që priten marrin përgjigjen të Opozitës; Kreu i KQZ-së dhe Kryeprokurori.
“Momenti kur diskutohet për mandatin e Prokurorit të Përgjithshëm, është sipas meje momenti i duhur për të diskutuar, jo thjesht daljen nga situata e fundmandatit të prokurorit në detyrë dhe hyrjen në fazën e nje mandati te përkohshëm me një prokuror të përkohshëm, po nisjen e një faze të re bashkepunimi mes qeverisë e opozitës në vigjilje të vendimit për çeljen e negociatave të Shqipërisë me Bashkimin Europian. Unë i di mirë besoj pikat ku opozita ndahet me ne, po besoj e di mirë edhe cdo përfaqësues i opozitës qe ka lidhje me partnerët ndërkombëtarë, se ata nuk e aprovojnë ekspozimin në gjuhë të huaj të dasisë së egër të politikës tonë të brendshme. Dhe jo vetëm nuk e aprovojnë, por ka ndër ta që e përqeshin dhe e përdorin si argument, për ngurrimin e tyre të brendshmëm qe të aprovojnë çeljen e derës së negociatave për Shqipërinë.
Natyrisht opozitës nuk i kërkon kush qe të heshtë, aq më pak mund të më shkojë mua në mendje diçka e tillë. Çka unë i kërkoj opozitës është të konsiderojë pa humbur kohë ftesën që të ulemi në tryezë për çështjen aktuale të Prokurorit të Përgjithshëm dhe të bëjmë një Pakt Kombëtar për Europën që duam. Të thjeshtë, të qartë dhe serioz. Me disa hapa të përbashkët drejt çeljes së negociatave (dhe pse jo edhe përtej nëse ka mundësi në rrugën e arsyes), si shprehje e vullnetit të mirë për ta vënë Shqipërinë mbi partitë dhe axhendën e përbashkët kombëtare mbi axhendat e përveçme të politikës së ditës.
Kjo do të ishte rruga më e arsyeshme për të mos përdorur kartonat e shumicës së thjeshtë në çështjen e Prokurorit të Përgjithshëm dhe për të mos i lënë asgjë mangut përpjekjes për t’i çelur negociatat për anëtarësim. Të cilat kësisoj, do të ishin një fitore e madhe e vendit në arenën ndërkombëtare. Një fitore madhe e politikës ne tërësi dhe e asnjë pale në veçanti. Një fitore e madhe e të gjithë shqiptarëve pa dallim.“/ Përgatiti: AlpeNews.al
