Ueb-sajti amerikan i lajmeve, Business Insider, ka përpiluar një listë, që rendit qytetet evropiane ku njeriu mund të jetojë me më pak se 600 funte në muaj. Pjesë e listës është edhe kryeqyteti i Kosovës, dhe ai i Shqipërisë.
BI ka shfrytëzuar të dhënat nga Indeksi i Kostos së Jetesës, i publikuar nga Numbeo, që analizon koston e jetesës së përditshme në qytetet më të rëndësishme nëpër botë.
Indeksi përfshin një numër faktorësh, përfshirë çmimin e sendeve ushqimore, çmimin e të ushqyerit në restorante, çmimin e udhëtimeve, çmimin e qirasë, por edhe çmimin e veshjeve dhe të filmave në kinema.
Vendin e 26’të, dhe të fundit, në listën e qyteteve evropiane ku mund të jetosh me më pak se 600 funte në muaj, e zë Sarajeva, në Bosnjë e Hercegovinë (591 funte).
Kryeqyteti i Kosovës, Prishtina, renditet i katërti, me kosto të jetesës prej 437 funtesh në muaj.
Ndërkaq, kryeqendra e Shqipërisë, Tirana, ndodhet në vendin e 19’të në listë, me kosto jetese prej 554 funtesh në muaj.
Vendin e parë në këtë listë e zë Dnipro, në Ukrainë – 392 funte. Edhe vendin e dytë dhe atë të tretë e zënë qytete ukrainase – Lvivi (405 funte) dhe Karkovi (408 funte).
