Pak pasi Këshillit të Ministrave miratoi vendimin për kompensimin e qirasë së banesës në të cilën do të jetojë Arta Marku gjatë qëndrimit në detyrën e Kryeprokurores së Përkohshme ka reaguar ish ministri i Drejtësisë Ylli Manjani.
Nëpërmjet një postimi në rrjetin social “facebook” Manjani thotë se ky vendim është i paligjshëm.
“Sipas Kushtetutës, qeveria që të marrë një vendim duhet pa tjetër ta autorizojë ligji për këtë gjë. Pra ligji duhet të përcaktojë të drejtën e qeverisë për ta marrë atë vendim pë atë çështje që rregullon ligji,” shkruan Manjani.
Postimi i plotë:
Thjesht për ta ditur…
—————
Vendimi që Qeveria ka miratuar sot për ti paguar qeranë zonjës Arta Marku, është krejt i paligjshëm!
Sipas Kushtetutës, qeveria që të marrë një vendim duhet pa tjetër ta autorizojë ligji për këtë gjë. Pra ligji duhet të përcaktojë të drejtën e qeverisë për ta marrë atë vendim pë atë çështje që rregullon ligji.
Referenca që vendimi i bën neneve 4 dhe 45 të ligjit për Menaxhimin e sistemit Buxhetor, autorizon Ministrin e Financave e jo Kryeministrin të propozojë vendime.
Në këtë vendim Ministri i Financave duket që është anashkaluar nga detyra e tij ligjore.
Nga ana tjeter çpunë ka qeveria të vendosë për fondet që i i janë caktuar në ligjin për Buxhetin, një institucioni të pavarur nga qeveria?!!
E thonë pastaj se nuk e ka kapur drejtësinë!!!
Ky vendim mund të kishte sens, sipas nenit 45 të ligjit për menaxhimin e sistemit buxhetor, vetëm nëse do ti jepte prokurorisë fonde shtesë nga fondi rezervë, por jo nga fondet që i janë caktuar prokurorisë.
Më në fund, mbi ç’ligj autorizohet qeveria të paguajë qeranë e shtëpisë së Prokurorit të Përgjithshëm?!
Tre rrjeshta vendim dhe i ka shkruar me arrogancë sikur është pronari i pareve të shtetit!
As ministrat e vet nuk i njeh…
Jo se mbeti te ky vendim për tu gjykuar ligjshmëria e këtij Kryeministri, por thjesht sa për ta ditur!
Le ta mbajmë shënim edhe këtë!
