Nesër pritet që të nënshkruhet marrëveshja për koalicion mes Lëvizjes Vetëvendosje dhe Lidhjes Demokratike të Kosovës, ndërkohë, ende zyrtarisht nuk dihen detaje për ndarjen e ministrive, postin e presidentit dhe kryetarit të parlamentit të Kosovës.
Në takimin që u mbajt dje në mes Isa Mustafës dhe Albin Kurtit, u tha se është përmbyllur 100 për qind harmonizimi i programit qeverisës, duke u pajtuar për të gjitha çështjet e hapura, e po ashtu edhe sa i përket kabinetit qeverisës, sipas të cilëve do të ketë 12 ministri.
Krahas kësaj, është raportuar se pesë ministri do i takojnë Lëvizjes Vetëvendosje, pesë Lidhjes Demokratike të Kosovës, një minoritetit serb dhe një për minoritet tjera.
Lutfi Haziri nga Lidhja Demokratike e Kosovës, nuk ka dashur të jap detaje, duke thënë se “këto detaje do të bëhen publike kur të vije koha”.
Detaje nga kjo marrëveshje e cila pritet të nënshkruhet nesër, nuk kanë shpalosur as përfaqësues të Lëvizjes Vetëvendosje. Zyrtari për media nga kjo parti, Arlind Manxhuka tha se të gjitha do të kuptohen nesër.
“Nuk mundemi ende të shpalosim asnjë detaj nga marrëveshja, meqenëse nesër është paralajmëruar nënshkrimi i marrëveshjes për koalicion VV-LDK, atëherë aty do t’i shohim të gjitha detajet”, ka thënë ai për KosovaPress.
Lëvizja Vetëvendosje dhe Lidhja Demokratike e Kosovës, pas gati dy muaj bisedime që nga përfundimi i zgjedhjeve, kanë harmonizuar 100 për qind programin qeverisës.
Kujtojmë se subjekti i Albin Kurtit në zgjedhjet e 6 tetorit ka arritur t’i marrë 29 deputetë, LDK një më pak, 28. Ndërsa, iu duhen edhe disa vota të pakicave për të ndërtuar qeverinë e re. E sipas të gjitha gjasave, dita e hënë pritet të jetë vendimtare për marrëveshjen rreth themelimit të udhëheqësisë së re.
