Policia e Tiranës ka zbardhur ngjarjen e ndodhur mbrëmjen e djeshme në Bathore, ku një i ri mbeti i plagosur me armë zjarri.
Blutë e kryeqytetit sqarojnë se është identifikuar dhe është kapur autori i dyshuar i ngjarjes. I plagosuri Elvis Visha ndërkohë ndodhen ende në spital, ku po merr ndihmën e nevojshme mjekësore. Ai u paraqit mbrëmjen e djeshme, me një plagë të shkaktuar më armë zjarri në zonën e krahut.
Sipas policisë, ngjarja ndodhi në rrugën “Ali Këlçyra”, ku gjatë një konflikti për motive të dobëta, Donaldo Bajrami dyshohet se ka qëlluar me armë zjarri bashkëmoshatarin e tij Elvis Visha, duke e plagosur në krah.
Njoftimi i policisë:
Zbardhet dinamika e ngjarjes së ndodhur dje, në Bathore, ku mbeti i plagosur me armë zjarri një 24-vjeçar. Identifikohet, kapet dhe vihen në pranga autori i dyshuar i ngjarjes. Vijon puna për gjetjen e armës së zjarrit me të cilën u plagos 24-vjeçari, i cili është jashtë rrezikut për jetën.Pasditen e djeshme, pas marrjes së njoftimit se në spital ishte paraqitur për të marrë mjekim, një shtetas që ishte plagosur me armë zjarri, specialistët e Sektorit për Krimet e Rënda të DVP Tiranë në bashkëpunim me Komisariatin e Policisë Nr. 5, organizuan menjëherë punën, me qëllim zbardhjen e rrethanave të rastit dhe identifikimin e autorit. Si rezultat i veprimeve profesionale, u identifikua, u kap dhe u vu në pranga autori i dyshuar, shtetasi:
D. B., 24 vjeç, për veprat penale “Vrasja me dashje”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”. Nga veprimet e para hetimore dyshohet se dje, në rrugën “Ali Këlçyra”, shtetasi D. B., gjatë një konflikti për motive të dobëta, me shtetasin E. V., 24 vjeç, e ka plagosur atë, në krah, me armë zjarri. Shtetasi E. V. ndodhet në spital, në kujdesin e mjekëve, jashtë rrezikut për jetën.
