Kryeministri i Britanisë së Madhe Boris Johnson është shprehur në një deklaratë të fundit se Putini e pushtoi Ukrainën pasi aty ka “liri të shtypit”, “zgjedhje të lira” dhe presidenti rus është i tmerruar se modeli ukrainas mund të përhapet edhe në Rusi.
Johnson vijoi edhe më tej duke thënë se në Moskë po vriten kundërshtarët politik dhe ka një ndryshim të madh nga Ukrainë.
Kryeministri Boris Johnson foli për Ukrainën gjatë një konference të Partisë Konservatore në Blackpool këtë të shtunë. Johnson tha se Putin bëri një gabim katastrofik duke pushtuar Ukrainën dhe se vendi i tij do të vazhdojë të mbështesë popullin ukrainas.
“Rezistenca heroike e Ukrainës po na tregon çdo ditë se Putini ka bërë një gabim katastrofik,” tha ai.
Johnson vuri në pikëpyetje arsyen pse Putin nisi pushtimin në shkallë të plotë të Ukrainës, duke hedhur poshtë idenë se ishte për shkak të shqetësimeve për anëtarësimin e vendit në NATO.
“Ai ishte i frikësuar nga Ukraina, sepse aty ekziston fjala e lirë. Dhe se Ukraina zhvilloi zgjedhje të lira dhe me çdo vit vendi ka përparuar drejt lirisë, demokracisë dhe tregjeve të hapura, ai i frikësohej shembullit të Ukrainës, “tha Johnson.
“Sepse në Rusinë e Putinit, ju do të dënoheni me 15 vite vetëm sepse keni kundërshtuar luftën. Dhe nëse do të jeni kundër Putinit ju do të pushkatoheni. “Është jetike që pushtimi i Moskës të dështojë, tha Johnson, pasi “një Putin fitimtar nuk do të ndalet në Ukrainë”.
Kryeministri britanik pranoi se vendosja e sanksioneve ka kosto, por sipas tij “kostoja duke mos bërë asgjë do të ishte shumë më e lartë”.
“Ne duhet të ndërmarrim hapat e nevojshëm për t’i dhënë fund varësisë sonë nga nafta dhe gazi i Putinit,” tha ai.
Johnson tha gjithashtu se Vladimir Putin është “mbyllur në një dhomë” pa kuptuar se çfarë po ndodh.
“Nëse ai do të kishte gazetarë të lirë, të përgjegjshëm, do ta dinte të vërtetën se ukrainasit janë një komb krenar me një lider karizmatik. Ai do ta dinte përpara se të merrte këtë vendim katastrofik dhe çnjerëzor se ata do të luftonin për të mbrojtur atdheun e tyre,” përfundoi kryeministri.