Në kuadër të Ditës Botërore të Mësuesve, ministrja për Marrëdhëniet me Parlamentin Elisa Spiropali ka bërë një dedikim të veçantë mësueses së saj, Angjelinës.
Ajo ka postuar në ‘Facebook’ një foto, ku tregohen karakteristikat e deftesës që mësuesja ia ka shkruar në fund të klasës së pestë.
Sipas Spiropalit, Angjelina ka qenë personi i parë që i ka zgjuar imagjinatën për të studiuar në Oxford.
‘Mësuese Angjelina i shkurtoi distancat dhe e realizoi këtë kapërcim duke hapur fillimisht në trurin tim shtegun e imagjinatës’, shkruan ministrja.
Statusi i plotë:
Fill pas prindërve, janë mësuesit ata që me lodhjet dhe sjelljet e tyre, na shenjojnë përgjithmonë.
Në klasë të pestë mësuesja kujdestare, Angjelina Kallugjeroviq, shkroi në rreshtat e karakteristikës time, jo klishetë e zakonshme mbi sjelljen dhe përparimin në mësime, por diçka tjetër që më habiti mua dhe i bëri prindërit e mi të shiheshin në sy. Sipas zysh Angjelinës unë duhet të studioja në Oksford. Ç’ishte ky Oksford?! Sa larg distanca materiale dhe mendore që e ndante lagjen time në Tiranë nga Oxford city?! Dukej e pakapërcyeshme. Por mësuese Angjelina i shkurtoi distancat dhe e realizoi këtë kapërcim duke hapur fillimisht në trurin tim shtegun e imagjinatës.
Sot në Ditën Botërore të Mësuesve kujtoj me respekt të thellë Zysh Angjelinën dhe të gjithë mësuesit që na bëjnë të ëndërrojmë, na frymëzojnë, na përgatisin të bëhemi ata që jemi.
Gëzuar festën Mësues të dashur që bëni të mira aq sa për t’ju shpërblyer koha nuk mjafton!
