Numri i pasagjerëve që kanë udhëtuar në portet e vendit tonë në vitin 2018 është rritur me 51% krahasuar me vitin 2013.
Sipas të dhënave nga Ministria e Brendshme për transportin detar në vitin 2018 në vendin tonë kanë hyrë 1.52 milionë udhëtarë, ndërsa në 2013 1.01 milionë udhëtarë.
“Është e rëndësishme të theksohet se kemi një rritje prej 162% të shtetasve të huaj krahasuar me vitin 2013. Në 2018, 33% e udhëtarëve që kanë hyrë janë shtetas italianë, të ndjekur nga britanikët, polakët dhe gjermanët”, theksohet në raportin e Ministrisë së Brendshme.
Një tjetër aktivitet që kryhet në portet tona është edhe transporti i mallrave, ku një tregues i rëndësishëm është numri i kontenierëve që janë përpunuar.
Sipas këtij raporti: “Në 2013 janë përpunuar 109 mijë kontenierë, ndërsa në 2018 135 mijë kontenierë, pra 23% më shumë. Pasqyrimi i këtij volumi të shtuar reflektohet edhe më shumë në vlerën e eksportit. Krahasuar me vitin 2013 vlera e produkteve shqiptare të eksportuara ishte 26% ose 600 milionë euro më shumë”.
Porti i Durrësit është pika kryesore e transportit detar shqiptar. Pozicioni shumë i favorshëm gjeografik e bën atë portin më të madh në vend dhe ndër më të mëdhenjtë në detin Adriatik dhe Jon, dhe një nyje shumë të rëndësishme për tregun ndërkombëtar.
Infrastruktura operacionale e Portit të Durrësit përbëhet nga 11 kalata. Mallrat kryesore që përpunohen në port janë mallrat e përgjithshme drithëra, kontenierë, tragete, minerale etj. Porti i Durrësit ka aktualisht 78% të tregtisë detare në nivel kombëtar.
Porti i Durrësit është gjithashtu një vendndodhje kyçe për rrjetet e trageteve dhe tranzitin e pasagjerëve, duke i dhënë Durrësit një pozicion strategjik në lidhje me Korridorin VIII, që do lehtësojë tranzitin e pasagjerëve dhe mallrave në kontinentin Europian.
Ndërkohë që Porti i Vlorës, Shëngjinit dhe Sarandës janë tre portet e tjera të vendit, me impakt më të madh në transportin e pasagjerëve, por jo vetëm.
