Vazhdon të thellohet kriza e opozitës shqiptare, e cila rrezikon të shpërbëhet dalëngadalë, para zgjedhjeve lokale të 30 qerhorit. Pas entuziazmit fillestar të djegies së mandateve të të gjithë deputetëve, protestë pas proteste flaka e kashtës politike ka nisur të shuhet.
Sinjalin e alarmit për këtë e dha fillimisht vetë kryetari i opozitës Lulzim Basha kur i tërhoqi vëmendjen ish deputetëve të PD, që të mos qëndronin nëpër kafene me njëri tjetrin, por të viheshin në ballë të protestave dhe të shkonin në bazë për tu takuar me qytetarët sepse “zgjedhjet janë pas dere”.
Por, kanë kaluar disa javë nga atëherë dhe askush nuk duket se ja ka vënë veshin fjalëve të Bashës. Nëpër protesta janë parë vetëm një grusht deputetësh nga 58 që i dogjën mandatet. Përveç Flamur Nokës, Klevos Balliut, Ervin Salianjit, Grida Dumës dhe ndonjë tjetri tek- tuk, syri nuk të sheh më ish deputetë të PD. E njëjta situatë duket edhe në radhët e LSI, ku në protesta sheh vetëm 3-4 deputetët më të rinj në moshë rreth Monika Kryemadhit, ndërsa të tjerët as që duken më.
Burime të Alpenews.al nga PD dhe LSI thanë se pjesa më e madhe e ish deputetëve ose i janë rikthyer punëve dhe profesioneve që kanë patur përpara se të angazhoheshin me kohë të plotë në politikë, ose janë në kërkim të një pune të re.
Profesorët Valentina Duka nga PD dhe Shezai Rrokaj nga LSI, janë dy shembujt e parë të këtij fenomeni. Ata janë rikthyer përfundimisht nëpër fakultetet ku kanë dhënë mësim nëpër universitete, për të mos u kthyer më në selitë e partive si dikur. Ndërkohë që të njëjtën rrugë me ta, po ndjekin edhe shumë ish deputetë të tjerë sidomos ato të rretheve.
Kaq mjafton për të kuptuar sesa e sinqertë ishte opozita jonë kur tha se i dorëzuam mandatet me vullnetin e secilit prej deputetëve, që të jemi si populli, në rrugë për të rrëzuar qeverinë Rama.
Alpenews.al