Kreu i Grupit Parlamentar, Taulant Balla ka folur në lidhje me protestën e organizuar nga të rinjtë për vrasjen e 25-vjeçarit Klodian Rasha.
Ai u ka shprehur ngushëllime familjarëve dhe i ka bërë thirrje prokurorisë që të hetojë me përpikmëri këtë çështje.
Nga studio e News 24, Balla ka thënë se protesta nuk është problem, por në kushtet e pandemisë nuk është e lejueshme.
Ai u ka bërë thirrje prindërve që të mos i lënë fëmijët e tyre që të përdoren politikisht nga PD-LSI.
“Përfitoj nga rasti që t’u shpreh ngushëllimet familjare dhe i bëj thirrje prokurorisë që të hetojë vrasjen e 25-vjeçarit me përpikmëri.
Asnjëherë protesta nuk është një problem, është një shprehje e demokracisë, por duhet marrë në disa rrethana. Ne jemi në kushtet e pandemisë që nuk lejohen grumbullimet. Po edhe në rast se ata të rinj u organizuan vetë, ata u përdorën nga politika. Është e pakuptimtë që një person si Sali Berisha i cili ka dhënë urdhër që të vriten njerëz në mes të bulevardit.
Mos i lini fëmijët tuaj që t’i keqpërdorin këta politikanë që bëjnë politikë me vdekjen. Kush ka bërë politikë me vdekjen ka pasur një fund.
Unë e mirëkuptoj të protestosh, unë nuk di se ku është faji i semaforëve, i tabelave të rrugëve, i bizneseve private që janë sulmuar. Unë nuk gjej arsye që në këtë situatë që na duhet të përballemi me pandeminë, duhet të përballemi edhe pa rregullsitë.
Në kushtet e një ideje për të ngritur zërin për të kërkuar drejtësi, kjo është e pranuar. Unë nuk gjej dot mendje shqiptari të shëndoshë, që duke kërkuar drejtësi për Klodianin t’i vejë zjarrin Shqipërisë. Zjarrin Shqipërisë ia ka vënë Iliri, Monika e Berisha për 30 vite.
Nuk e kuptoj se si këta bëjnë politikë me vdekjen. Që politika me vdekjen kthehet në argument është për të ardhur keq”,- tha Balla.
Më tej ai ka komentuar edhe deklaratën e ish-deputetes së PD-së Orjola Pompuri, e cila ngriti alarmin se fëmijët po arrestoheshin nga policia.
Pampuri, me anë të një postimi në rrjetet sociale u shpreh se sipas saj fëmijë dhe adoleshentë janë terrorizuar këto ditë nga policia.
“Është një deputete ekzemplare e shpërdorimit që njerëzit e gjallë i bën të vdekur, që thoshte se fëmijët tanë janë arrestuar në protestë. E para njëherë nuk janë fëmijët e saj, janë fëmijët e shqiptarëve që shpërdorohen”,- u shpreh Balla.
Përsa i përket djegies së pemës së Krishtlindjeve nga protestuesit, Balla mori shembullin personal të familjes së tij. Sipas tij, djali i tij nuk do të shkonte kurrë që të digjte pemën që është simbol për shumë të krishterë.
“Unë jam një mysliman, bashkëshortja ime është ortodokse. Dhe ashtu si shumë shqiptarë i festojmë të gjitha festat. Nuk gjej dot një arsye se pse djali do të shkonte të digjte pemën e Krishtlindjeve, kur ajo është një simbol për shumë familje të krishtere”,- tha Balla.
