Presidenti i Shqipërisë vijon të gabojë duke dashur që të gjejë raste analoge, për të justifikuar aktin e tij të paprecedentë, me protestën që ka thirrur më 2 mars në Tiranë. Me anë të një postimi në facebook, Ilir Meta shkruan: “Kujtoj se vetëm 3 vite më parë, Presidenti i Rumanisë mike, vend anëtar në NATO dhe në Bashkimin Europian, doli në protestë në mbrojtje të shtetit ligjor dhe kundër dhunimit të Kushtetutës nga një mazhorancë dhe Parlament plotësisht kushtetues. Presidenti rumun ju bashkua protestave të mëdha popullore kundër korrupsionit, arbitraritetit, vendimeve të marra në errësirë, ndryshimeve mafioze të legjislacionit në fuqi nga deputetët legjitimë, por në konflikt të hapur interesi, si dhe pastrimit të politikës nga kriminelët.”
Po si qëndron e vërteta?
E para, Presidenti i Rumanisë nuk ishte organizatori i protestave siç Presidenti i Republikës sonë ka deklaruar me shkrim e me gojë se është. Kreu i shtetit rumun iu bashkua protestave të organizuara nga qytetarët, në mbështetje të sensibilitetit të tyre.
E dyta, protestat në vendin anëtar të NATO e të BE së cilës i referohet Ilir Meta, u zhvilluan sepse qeveria e Bukureshtit ishte KUNDËR reformës në drejtësi. Ndërsa në Shqipëri, qeveria është PRO reformës në drejtësi, ndërsa Presidenti kundër.
E treta, ndryshe nga Ilir Meta që është zgjedhur me vote nga Parlamenti, Presidenti i Rumanisë zgjidhet drejtpërdrejtë me vote nga populli ndaj ka edhe më shumë fuqi kushtetutese.
E katërta, Presidenti i Rumanisë ndryshe nga Ilir Meta, nuk doli në protestë për tiu kundërvënë procesit të shkarkimit që Parlamenti ka nisur kundër tij.
E pesta, siç shihet Presidenti i Rumanisë nuk kishte ndonjë hall personal siç ka Ilir Meta, që po mundohet të na e shesë të vetin, si një hall të madh kombëtar.
E gjashta, Presidenti i Rumanisë nuk bëri ndonjë betejë publike përmes një seriali aktesh antikushtetutese ndaj qeverisë, për të justifikuar më pas daljen në shesh në emër të gjoja mbrojtjes së Kushtetutës, siç po bën Ilir Meta në Shqipëri.
E shtata, Presidenti i Rumanisë nuk kishte asnjë projekt të ri politik për të krijuar. Ndërsa në Shqipëri, mediat kanë kohë që flasin për një projekt të Ilir Metës që synon krijimin e një lëvizje apo force të re politike, një akt ky që nuk përputhet me statusin e Kreut të Shtetit që duhet të mos kryejë aktivitet politik gjatë kohës që ndodhet në këtë funksion.
Siç shihet, janë plot 7 të pavërteta në pretendimet e Kreut të Shtetit, se ajo që ai do të bëjë është një akt normal. Siç kuptohet pas kësaj, rasti i Ilir Metës është i pangjashëm me çdo rast tjetër. Është hera e parë në histori që një President, nga personi që Kushtetuta e detyron të jetë mbi palët, po thërret në shesh përfaqësues të një pale për tiu kundërvënë për hallin e tij personal, një pale tjetër!
ALPEnews.al