Kreu i Partisë Demokratike Lulzim Basha mblodhi në seli sot në mbrëmje grupin parlamentar dhe kryesinë e partisë për të diskutuar mbi vijimin e aksionit opozitar.
Pritet që në këtë mbledhje të merren vendime të rëndësishme, që lidhen me protestat në kuadër të thirrjes për mosbindje civile por edhe në lidhje me protestën e nesërme ku janë ftuar bizneset e vogla që për një orë të mbyllin dyqanet.
Javën e shkuar opozita mbajti një tubim duke bllokuar 4 akset kryesore të vendit në Vorë, Milot, Bradashesh dhe Çermë. Kjo protestë solli më pas edhe procedimin penal të disa eksponentëve të opozitës, pasi nuk kishin marrë leje për tubimin.
*******************
Vendimi që u mor: Raportohet se bizneset do të protestojnë në disa pika, duke nisur nga tregu çam, medreseja, tregu elektrik, tregu ushqimor, dyqanet tek rruga e Durrësi dhe e Kavajës.
Burime nga mbledhja e PD zbuluan dhe bashkëbisedimin e Lulzim Bashës sot me deputetët në mbledhjen e grupit.
“Qytetarët mendojnë se presioni duhet zgjeruar, sepse ka patur impakt të madh pas protestës së të enjtes.”, mësohet të jetë shprehur Basha. Ndërkohë, të njëjtat burime theksojnë se në vazhdën e protestave, është menduar që brenda kësaj jave të këtë bllokim rrugësh në kryeqytet.
