Një ditë para protestës së opozitës përballë kryeministrisë, ka ardhur reagimi i ambasadës së SHBA në Tiranë. Përmes një postimi në faqen zyrtare në Facebook, ambasada e SHBA apelon që të gjithë aktorët të tregojnë vetëpërmbajtje dhe të shmangin dhunën.
Ambasada e SHBA e konsideron Qeverinë dhe Parlamentin aktual të Shqipërisë të zgjedhura në mënyrë legjitime, ndërsa për opozitën që dogjën mandatet thotë se ata hoqën dorë nga detyrimet ndaj qytetarëve shqiptarë dhe duhet të lejojnë ata që duan të punojnë për të ardhmen e vendit të bëjnë punën.
Reagimi i ambasadës së SHBA në Tiranë:
🇦🇱 | Pavarësisht se protesta paqësore është një shtyllë themelore e demokracisë, nxitja apo kryerja e veprimeve të dhunshme, përfshirë edhe shkatërrimin e pronës publike, janë të paligjshme. Ne i nxisim të gjithë aktorët e demokracisë shqiptare që të ushtrojnë vetëpërmbajtje në protestën e 16 marsit. Ambasada e Shteteve të Bashkuara i konsideron Qeverinë dhe Parlamentin aktual të Shqipërisë të zgjedhura në mënyrë legjitime nëpërmjet zgjedhjeve të vitit 2017, të njohura ndërkombëtarisht. Ne vlerësojmë punën e mirë që është bërë në zbatimin e reformës në drejtësi në Shqipëri, si dhe përparimin në luftën kundër korrupsionit dhe krimit të organizuar. Ka ende punë për të bërë. Ndërkohë që, ata ish anëtarë të Parlamentit të cilët vendosën të braktisin mandatet, hoqën dorë nga detyrimet e tyre ndaj qytetarëve shqiptarë, duhet të lejojnë ata që duan të punojnë për të ardhmen e vendit të bëjnë punën e tyre. Ne mbështesim të gjithë ata që vazhdojnë të jenë të përfshirë në procesin demokratik në Parlament, në mënyrë që Shqipëria të vazhdojë të ecë përpara, drejt anëtarësimit në Bashkimin Europian.
