Mbrojtja e të arrestuarve e ka vlerësuar vendimin e gjykatës si të pabazuar në ligj dhe jo produkt të provave të hetimit, ndërsa hedh dritë mbi një denoncim të bëra nga banorët e pallatit në lagjen numër 6 nga shembja e të cilit humbën jeten dy gra. Ky denoncim nuk u mor parasysh nga prokuroria, e cila vendosi mosfillimin e procedimit penal ndaj pronarit të lokalit Baron’s në atë kohë.
Avokati Ilia Ilia thotë se “vendimi është tërësisht i pabazuar. Nuk është detyrë funksionale e drejtuesit të Aluiznit, por e shefave të sektorëve. Në këtë rast mungon lidhja shkakësore midis veprimit a mosveprimit dhe pasojës. Në mënyrë si aludon organi i akuzës është jologjike dhe jo juridike, pasi në rastin e hotel “Miramare” legalizimi nuk merret me anën teknike, po me formalizimin e objekteve të ndërtuara pa leje dhe shtesave në të.
Në vitin 2014 dhe pse banoret ishin ankuar e denoncuar, prokuroria ka dhënë vendim për mosfillimin e çështjes penale ndaj pronarit të Baron’s, ndërkohë që ka dhe një autorizim të kryetarit të bashkisë për këtë rast.
Bëhet fjalë për lokalin, ku e gjitha pjesa e përparme, madje edhe ajo anësore në vend të mureve me tullë e zunë vendin vetratat e xhamit. Këto ndërhyrje rezultuan fatale duke u kthyer në pikën më të dobët të këtij pallati e si pasojë goditja e tërmetit do ta përpinte bar Baron’s bashkë me katet e sipërme duke iu marrë jetën dy grave të moshuara.
Pavarësisht ndërhyrjeve në strukturën e katit të parë, ky dokument që disponon Top-Channel tregon se Artur Bajram Terziu tashmë person në kërkim dhe Anisa Fatos Terziu person nën hetim ia kishin dalë ta legalizonin me firmën e kreut të ALUIZNIT Durrës Flamur Gjuzi i shpallur person në kërkim.
Këto dokumente janë pjesë e dosjes së Prokurorisë, e cila ka kërkuar arrestimin e ish shefit të legalizimeve Flamur Gjuzi, por edhe të pronarëve të lokalit. Siç dëshmuan banoret e pallatit, gjashtë herë ata kishin bërë padi për shkatërrimin e mureve mbajtëse të pallatit dhe gjashtë herë çështja ishte mbyllur.
Ky fakt do i shërbejë Prokurorisë për të ndjekur penalisht edhe inspektorët e Policisë dhe INUK që mbyllën çështjen duke hapur dy varre. Ndërkohë sipas këtij dokumenti tregohet tentativa për të legalizuar një shtesë anësore kati të hotelit Tropikal ku humbën jetën dy qytetarët nga Kosova Isa dhe Shemshedin Abazi. Pronari hotel Tropikal Abdulla Osmani ka përdorur formularin për legalizimin e ndërtimeve pa leje.
