Në rendin e ditës në seancë plenare, zgjedhja e Prokurorit të Përgjithshëm të Përkohshëm është pika e pestë në seancë, por deputetët e opozitës do të jenë në Parlament vetëm për të kundërshtuar këtë vendim.
Burime pranë opozitës sqarojnë se, deputetët e Partisë Demokratike do të bllokojnë foltoren e Kuvendit nëse maxhoranca nuk do të tërhiqet nga vendimi i saj për të zgjedhur Prokurorin e Përgjithshëm të Përkohshëm.
Të njëjtat burime sqarojnë se, deputetët e PDsë nuk do të lejojnë zhvillimin e një seance normale, për aq kohë sa është menduar nga maxhoranca, që në fund të seancës të shkelet Kushtetuta duke u emëruar një Kryeprokuror vetëm me votat e saj.
QËNDRIMI
Kreu i opozitës, Lulzim Basha ka paralajmëruar Kryeministrin se nëse do ta çojë deri në fund puçin e tij kushtetues, do t’i japë një goditje të fortë bashkëjetesës demokratike dhe stabilitetit në vend.
“Edi Rama ka dy qëllime. Duke dhunuar Kushtetutën, të emërojë një Prokuror politik. Duke emëruar një Prokuror politik, të pengojë, të ngadalë- sojë apo të asgjësojë dosjet e krimit dhe korrupsionit, që lidhin bashkëpunëtorët e tij të ngushtë me krimin dhe me atë vetë. Nëse Edi Rama tenton të çojë deri në fund puçin e tij kushtetues, duhet ta dijë se kostoja e përballjes do të jetë e madhe, në kuptimin e goditjes që do t’i japë bashkëjetesës demokratike, stabilitetit në vend, dhe se shqiptarët, si çdo komb tjetër i civilizuar, nuk mund dhe nuk do ta pranojnë as dhunimin e Kushtetutës, as kapjen politike të drejtësisë, as asgjësimin e Reformës në Drejtësi, për të cilën kemi investuar kaq shumë dhe që shqiptarët mezi e presin për interesat e tyre si qytetarë, por edhe për interesin madhor kombëtar të pastrimit të politikës nga krimi, pa të cilën nuk do të ketë as hapje negociatash, as Shqipëri europiane. Bashkohemi për të mbrojtur Kushtetutën, për të mbrojtur drejtësinë nga kapja politike, për të mbrojtur Reformën në Drejtësi”, tha Basha.
