Ministri i Brendshëm Bledi Çuçi, në mbledhjen e sotme në Komisionin e Ligjeve, foli për projektligjin për Agjencinë e Mbikëqyrjes Policore (AMP/SHÇBA).
Gjatë fjalës së tij Çuçi tha se nga inspektimet e bërë nga SHÇBA në Policinë e Shtetit ka evidentuar problem që kërkojnë përfshirjen e sektorit të certifikimit.
“Disa nga problematikat shqetësuese që lidhen me procesin e pajisjes me certifikatë është se nuk ndiqen afatet e pajisjes me certifikatë dhe krijohen periudha të pambuluara. Po ashtu subjektet e agjencisë nuk kanë krijuar një databasë për të kontrolluar punonjësit që nuk janë pajisur me certifikatë apo që u ka mbaruar afati”, tha ai, duke shtuar se këto problematika kanë ndikuar drejtpërdrejt në implikimin e punonjësve të policisë në situata korruptive.
SHÇBA me projektin e ri merr përgjegjësinë që të udhëheqë procesin që nga fillimi.
“I gjithë procesi që çon në marrjen e certifikatës do të udhëhiqet nga agjencia dhe do të shkëputet nga policia, ndërsa ekzaminimi poligrafik ka lindur si detyrim për të luftuar korrupsionin dhe krimin e organizuar”, u shpreh ai.
