Përmirësimi i aksesit në financa përmes përdorimit të instrumenteve financiare siç është edhe kreditimi, ishte në fokus të takimit të organizuar nga Programi Italo-Shqiptar për zhvillimin e Ndërmarrjeve të Vogla dhe të Mesme në Shqipëri në bashkëpunim me BiznesAlbania.
Pjesëmarrës në takim ishin shoqatat e biznesit dhe sipërmarrës të kryeqytetit. Ndërsa vlerësoi këtë program dhe rezultatet që ai ka sjellë, presidenti i BiznesAlbania, Luan Bregasi, theksoi se nga aktiviteti i realizuar bashkërisht tre vjet me parë ka pasur realisht kompani që kanë vazhduar të punojnë me kreditë e dhëna nga ky program.
Këto janë kredi që mbështesin zhvillimin e Ndërmarrjeve të Vogla dhe të Mesme (SME), për të përmirësuar teknologjinë dhe rritur konkurrueshmërinë në tregun lokal dhe ndërkombëtar, nëpërmjet inovacionit teknologjik dhe përmirësimit të standardeve të prodhimit.
KREDITIMI
Financimi është i rëndësishëm në periudha të rritjes ekonomike, por ai nevojitet gjithashtu dhe në kohë të vështira për të lehtësuar ristrukturimin e biznesit dhe për të siguruar qëndrueshmërinë e aktivitetit të sipërmarrësit. Linja e kredisë nëpërmjet programit për SME-të parashikon dhënien e një norme interesi dhe një afati shlyerjeje më të favorshëm se ato të tregut për SME-të që duan të blejnë mallra dhe shërbime me origjinë italiane.
LASKU
Drejtori i Njësisë së Menaxhimit të Programit, Gavril Lasku, prezantoi për pjesëmarrësit komponentët e Programit, si Linja e Kredisë që tashmë janë financuar 36 milionë euro dhe Fondi i Garancisë në 5 milionë euro. Ai përmendi vlerat për projektet nga 50.000 deri në 500.000 mijë euro, si dhe kriteret e lehtësuese për marrjen e kredisë. Lasku paraqiti gjithashtu filozofinë e punës dhe arritjet e deritanishme të Programit Italo-Shqiptar , si një program i suksesshëm në mbështetje të sipërmarrjes vendëse.
Ai përmendi dobinë e kredive të Programit në krijimin e një marrëdhënieje bashkëpunimi dhe mirëbesimi reciprok ndërmjet SME-ve dhe bankave tregtare. Nëpërmjet Fondit të Garancisë, Programi ndihmon realisht në rritjen e klientëve SME për bankat, duke mbuluar një pjesë të kolateralit, që iu duhet SMEve për marrjen e kredive. Gjithashtu, Lasku theksoi nevojën për sipërmarrjet e vogla dhe të mesme vendëse, që të orientohen drejt kapitalizimit të biznesit, përdorimit të teknologjisë së përparuar, si dhe të rrisin dijet dhe kontaktet me sistemin bankar, duke zhvilluar lidhje më të shëndosha e të qëndrueshme me bankat tregtare dhe me agjencitë e tjera financiare në treg.
Të pranishmit në takim ngritën pyetje dhe diskutuan rreth sfidave dhe nevojave të biznesit të SME-ve. Në përgjigje të pyetjeve të tyre, paneli i ekspertëve të Programit, konsulentët dhe përfaqësuesit e bankave paraqitën mundësi dhe zgjidhje që ofrohen në favor të sipërmarrësve të SME-ve.
