Asnjë surprizë në Durrës. Qyteti bregdetar ka konfirmuar sot Emiriana Sakon, si kryetaren e Bashkisë, e cila vijon kështu mandatin e saj parë zyrtar në krye të këtij institucioni.
Në fund të muajit shkurt të vitit 2020, drejtoresha e Përgjithshme e Shërbimeve dhe Punëve Publike në Bashkinë e Durrësit, Emiriana Sako u zgjodh nënkryetare.
Që pas tërmetit të 26 nëntorit dhe dorëheqjes së ish-kryebashkiakes Valbona Sako dhe ish-nënkryetares Etleva Kondi, bashkia e qytetit bregdetar mbeti vetëm me dy nënkryetarë (Florian Tahiri dhe Arbër Braho), ndërsa Zhuljen Varfaj u votua në Këshillin Bashkiak kryetar në detyrë, deri në mbajtjen e zgjedhjeve lokale të parakohshme në Durrës.
Në të gjitha vizitat që Kryeministri Edi Rama ka bërë në Durrës, dy muajt e fundit, për të inspektuar punimet që po realizohen në objektet që i janë nënshtruar riparimit të dëmeve që la pas tërmeti shkatërrimtar, Emiriana Sako është shfaqur gjithnjë në krah të kryetarit në detyrë Zhuljen Varfaj.
Që prej asaj kohe, në media u aludua se, përveçse është zgjedhur nënkryetare bashkie, Sako është duke u projektuar si kryetarja e ardhshme në detyrë, gjë e cila u konkretizua vetëm pak muaj më vonë, më saktë në muajin mars, kur ajo u emërua si kryetare e komanduar e Bashkisë së Durrësit.
Që në fillimet e saj në këtë detyrë, ajo është kontestuar vazhdimisht, pasi është konsideruar nga kundërshtarët e saj politikë si një “marionetë” e dirigjuar pikërisht nga një nga kryebashkiakët më afatgjatë në historinë politike të vendit, Vangjush Dako.
Pas konfirmimit zyrtar si kandidatura e Partisë Socialiste për Bashkinë e Durrësit, Sako u përball me një sërë faktesh, të publikuara nga kundërshtarët e saj politikë, të cilët e lidhnin prezencën e saj pikërisht me Vangjush Dakon, ky i fundit i shkarkuar pas nisjes së hetimeve ndaj tij nga ana e SPAK për dosjen e famshme 339, por edhe si një njeri i shpallur non – grata nga Shtetet e Bashkuara të Amerikës.
Por, fushata e Emiriana Sakos nuk do të kalonte pa denoncime apo skandale para dhe gjatë procesit të votimit.
Pak kohë më parë, vetëm dy javë para zgjedhjeve, në media u publikua një foto e shkëputur nga një takim elektoral me socialistët e Durrësit, tregon Dakon të ulur në krye të tryezës, duke menaxhuar fushatën për kandidaten e PS.
Në media qarkulloi ditën e djeshme edhe një foto që tregonte komisioneren e Partisë Socialiste të Spitallës në Durrës në brendësi të Qendrës së Votimit. Ndërsa ajo ka qenë e përqendruar në celularin e saj, një prej votuesve i ka bërë një foto që tregon një fletë votimi të plotësuar në tavolinën e komisioneres.
Vota ishte bërë gati dhe është plotësuar për Emirjana Sakon, siç duket nga foto. Një shkelje flagrante e procesit, pasi fleta e votimit është jashtë kutisë dhe duket se është bërë gati për qytetarët që do pritet të vijnë.
Figura e Sakos lidhet ngushtë edhe me të ashtuquajturën ‘afera e inceneratorëve’, ndërsa kujtojmë se vetëm pak ditë më parë Partia Demokratike njoftonte se ka kallëzuar në SPAK kryebashkiaken e Durrësit, pasi dyshohej se ka fryrë kostot e depozitimit të mbetjeve në landfillin e Sharrës.
Në lidhje me këtë çështje, Sako u thirr për të dëshmuar gjithashtu edhe në Komisionin Hetimor të ngritur për Inceneratorët, mbledhje të cilën e braktisi pa hyrë mirë brenda, pasi ka akuzuar deputetët e PD-së si injorantë dhe arrogantë.
Sako braktisi komisionin pasi deputetët po e pyesnin për procedurat e ndjekura për kalimin e plehrave të Durrësit në inceneratorin e Sharrës.
Kush është Emiriana Sako, karriera, shkollimi dhe aftësitë personale e profesionale:
Emiriana Sako është me profesion arkitekte dhe prej rreth 13 vitesh është pjesë e stafit të bashkisë.
Në periudhën 2009-2015, ajo ka punuar si specialiste në Drejtorinë e Planifikimit dhe Zhvillimit të Territorit.
Nga viti 2015-2018 ka mbajtur postin e Drejtorit të Shërbimeve Publike, ndërsa nga 2018 e deri në shkurt 2020 ka qenë Drejtoreshë e Përgjithshme e Shërbimeve dhe Punëve Publike në bashki.
Nga 2020 deri në mars 2022 ajo ka qenë kryetare e komanduar e Bashkisë së Durrësit, ndërsa nga sot ajo është kryetarja e re e kësaj bashkie, detyrë të cilën do ta ushtrojë për rreth 10 muaj, deri në zgjedhjet e reja lokale.
Sako është diplomuar për arkitekturë në Fakultetin e Inxhinierisë Civile në Tiranë ku ka ndjekur edhe masterin shkencor, ndërkohë që ka ndjekur një master profesional në një universitet në Romë, Itali.
Ajo gjithashtu ka dhënë kontribut në ndërtimin e projekteve të rëndësishme në qytet si Sheshi “Liria”, Sfinksi, Veliera etj, disa prej të cilave të kundërshtuara nga opozita apo opinioni publik.
Përsa i përket gjuhëve të huaja, Sako shkruan në CV-në e saj “Aftesi komunikuese dhe marrëdhënie ndërpersonale shumë të mira, specifikisht në ambiente të shkëmbimit kulturor, aftësi për të folur gjuhë të huaja anglisht, italisht, frëngjisht.”
