Emisioni “Java në RTSH” komentoi këtë javë momentin delikat të vakuumit të krijuar në mbarim të mandatit të kryeprokurorit Lalla.
Në studio me Preç Zogajn e Lorenc Vangjelin ishte edhe juristi Joni Braho i ftuar për të shpjeguar këtë tranzicion nga ana ligjore.
Braho nenvizoi se boshllëku juridik me kryeprokurorin e ri, vjen nga fakti që nuk është formuar ende Këshilli i Lartë i Prokurorisë, i cili duhej të përzgjidhte kreun e ri të organit të akuzës.
Braho thotë se mandati i Llallës ka mbaruar dhe se zgjidhja është që të zgjidhet një figurë me eksperiencë në prokurori, si figurë kalimtare deri në zgjedhjen definitive të kryeprokurorit sipas dispozitës së re kushtetuese, me formimin e KLP.
Ai thotë se garancitë për këtë proces qëndrojnë tek standartet që janë përcaktuar nga ligji edhe për fazën kalimtare.
Braho shprehet se koha e qëndrimit në detyrë të prokurorit të përkohshëm do të varet nga afatet e formimit të KLP dhe vijimësia e propozimit të kandidaturave për prokurorin e ri.
“Pesë muaj, një afat kohor i vështirë”, thotë juristi, kur pyetet për kohën e qëndrimit të kryeprokurorit në detyrë.
Zogaj u shpreh se zgjedhja e prokurorit vjen në një moment shumë delikat hetimesh.
Lorenc Vangjeli tha se ky debat nuk gjen zgjidhje në ligj, ai është në thelb debat politik.
Ai tha se procesi i vetingut do të prodhojë efekte të rëndësishme, ku gjahtarët mund të kthehen edhe në pre.
Zogaj deklaroi nga ana e tij, se debati duhet fokusuar tek procedura e zgjedhjes së kryeprokurorit të ri.
Ai tha se më në fund Prokuroria po guxon dhe duhet inkurajuar të hetojë.
“Ndoshta prokurorët po përpiqen të kapin trenin e fundit dhe kjo është gjë e mirë”, tha Zogaj.
Më tej diskutimi në studio vijon rreth numrit të votave që duhet për të zgjedhur kreun e ri të akuzës.
Juristi Braho tha se Kushtetuta nuk jep zgjidhje për kuorumin e votave.
“Mirë do të ishte të zgjidhej me 3 të 5-at”, tha ai.
“Por në kushtet aktuale politike ky kuorum është i pamundur”, tha ai.
Zogaj thotë se me 36 vota kryeprokurorin e kap Rama.
Vangjeli ndërkohë u shpreh se kjo është një dukuri e përhershme e jetës politike.
Sipas Zogaj, do ishte e paimagjinueshme që njëra palë ta kapë kryeprokurorin, në kohën kur ka kaq shumë hetime për njerëzit për qeverinë.
