Ndahet nga jeta Halil Minxholli një nga pionierët dhe kontribuuesit profesionist të artit të zhonglerimit.
Minxolli lindi në Peshkopi, më 18 shkurt të vitit 1946, ndërsa në moshën 9-vjeçare, u aktivizua me rrethin e Zhonglerëve, në ish Pallatin e Pionierëve në Tiranë. Ndërkohë në vitin 1962 ai u angazhua si amator në grupin akrobatik të Estradës së Shtetit, dhe po në atë vit u prezantua për herë të parë me një “Dyshe Zhonglerimi me shishe” në duet me Sekine Ahmeti, në “Prezantohem – Skënder Sallaku”.
JETËSHKRIMI
Në vitet 1966-1969 aktivizohet me Estradën e Ushtarit.
Minxholli diplomohet në IFK “Vojo Kushi” Tiranë.
Në vitin 1969 Halil Minxholli fillon punë si zhongler profesionist, për të punuar pa ndërprerje deri në vitin 1999, kur u largua në pension. Në këtë angazhim të gjatë artistik ka qenë pjesëmarrës në të gjitha premierat e realizuara nga institucioni. Ka ekzekutuar dhe krijuar një numër shumë të madh kombinimesh zhonglimi solo dhe me partnerë. Artisti Minxholli ka meritë të veçantë në krijimin e numrave me përmbajtje dhe karakter kombëtar, duke bërë që arti i zhonglerimit të “flasë” shqip.
Për vite me radhë në funksionin e Mjeshtrit ka drejtuar me profesionalizëm profilin e Zhonglerimit, duke bërë që të jetë ndër profilet më prodhues e bashkëkohorë, deri në daljen e tij në pension.
Prej vitit 1996, si President i Shoqatës Mbarëkombëtare të Artistëve të Cirkut Profesionist dhe Amator, ka ndikuar në lartësimin e vlerave të cirkut shqiptar, ka mundësuar pjesëmarrjen e artistëve shqiptar në aktivitete ndërkombëtare, si dhe bashkëpunime në marrjen e instrumenteve dhe literaturës bashkëkohore për cirkun.
Pas daljes në pension vazhdoi punën e tij në përgatitjen e artistëve të rinj, si dhe të krijoj për ta numra të spikatur artistik. Cirku Shqiptar humbi një nga pionierët dhe kontribuuesit profesionist të artit të zhonglerimit dhe familja njeriun e tyre të dashur.