Prodhimi i naftës argjilore në Shtetet e Bashkuara të Amerikës pritet ta rrisë prodhimin total në më tepër se 10 milionë fuçi në ditë, gjatë këtij viti, që do të jetë niveli më i lartë që nga viti i largët 1970.
Madje, sipas analistëve, ky nivel do të tejkalohet që në tremujorin e parë të këtij viti, por ecuria do të varet nga çmimet e naftës në tregjet ndërkombëtare.
Ndërkohë, qeveria amerikane parashikon se, prodhimi i naftës do të prekë nivelin e 11 milionë fuçive në ditë, gjatë vitit 2019, një nivel i njëjtë me Rusinë, që është prodhuesi më i madh në botë i naftës.
Ndikimet ekonomike dhe politike në rritjen e prodhimit të naftës në SHBA janë të jashtëzakonshme, pasi gjatë një dekade është ulur me 1/5 importi i naftës në vend, duke siguruar paga më të larta për komunitetin rural dhe duke ulur çmimet e konsumit për benzinën në vend me 37%, që nga viti 2008.
Eksportet e energjisë nga Shtetet e Bashkuara të Amerikës tashmë konkurrojnë me naftën e Lindjes së Mesme për blerësit në Azi.
Gjithashtu, edhe volumi ditor i tregtimit të kontratave “futures” në SHBA është dyfishuar gjatë dekadës së fundit, në një mesatare prej 1.2 miliardë fuçi në ditë, gjatë vitit 2017.
Ka qenë pikërisht rritja e prodhimit në SHBA, që detyroi OPEC, Rusinë dhe nëntë vende të tjera prodhuese, që në nëntor të vitit 2016, të arrijnë një marrëveshje për uljen e prodhimit me 1.8 milionë fuçi në ditë.
