Rezultatet e fundit të provimeve të Maturës 2018 janë publikuar mesditën e sotme në faqen zyrtare të Qëndrës së Shërbimeve Arsimore (ish-Agjencia Kombëtare e Provimeve pranë MASR).
Lajmi për Rezultatet e Provimeve të Maturës.
Në pamje të parë rezultatet janë ato të cilat përcaktojnë nëse një maturant do të mund të arrijë apo jo degën e preferuar. Por me ndryshimet e fundit në sistemin e gjimnazit, dhe me reformën aq-shumë të diskutuar të arsimit që prej 2016-ës disa gjëra kanë ndryshuar.
Rreth 36 mijë maturantë në të gjithë vendin do të përllogarisin rezultatet e provimeve si ato të detyrueshme (Gjuhë Angleze, Gjuhë dhe Letërsi Shqipe, Matematikë) dhe ato me zgjedhje (që janë dy) për të parë nëse do të renditen në listën fituese të degëve që do të zgjedhin.
Procedura funksionon si dy vitet e mëparshme.
Maturanti gjatë muajit gusht (MASR do të publikojë kalendarin e dative disa ditë më vonë) do të aplikojë nëpërmjet internetit në adresën “UAlbania”. Në këtë portal posaçërisht për maturantët të cilët aplikojnë për universitet janë të dhëna me detaje mënyrat e aplikimit.
Maturanti ka të drejtë të aplikojë deri në 10 profile studimi sipas dëshirës.
RAUNDET DHE PROCESI I ZGJEDHJES
Në vitin e shkuar janë organizuar dy raunde me faza 48-orëshe të cilat zgjatën mjaftueshëm për t’i lënë kohë maturantëve për të rizgjedhur profilet e studimit (ku mund të çregjistrohesh ose jo) sipas dëshirës.
E njëjta situatë mendohet të jetë edhe këtë Maturë. Pas aplikimit në profilet e studimit përgjatë muajit gusht, maturantët do të presin derisa sejcili prej universiteteve të publikojë listën fituese për fillimin e raudit të parë.
KUSHTET E NJË MATURANTI PËR TË APLIKUAR
Kushti më i rëndësishëm është që maturanti të mos ketë marrë asnjë prej provimeve (të detyrueshme ose me zgjedhje) notë nën 4.5, ky është një prej kushteve që aplikimi për në IAL publike dhe private kanë në listat e tyre.
Përfundimi me sukses i shkollës së mesme të përgjithshme ose profesionale është një kusht tjetër i ndjekur nga nota mesatare minimalisht 6, e vendosur me vendim të Këshillit të Ministrave.
Kriteret e vendosura që në muajin janar nga universitetet përcaktojnë kushtin kryesor për të aplikuar në një degë të caktuar, ndërsa ndjekja e studimeve paralelisht në dy degë studimi nuk lejohet për të gjithë.
/AlpeNews.al
