Ndërsa punësimi ka qenë prioritet i kësaj qeverie, dhe për vitin 2018 objektivi është ndërmjetësimi i 25 mijë punësimeve nga zyrat e punës, shifrat tregojnë se këto struktura nuk i kanë përmbushur detyrat e tyre dhe për vitin 2017 është regjistruar rënie e ndërmjetësimeve.
Sipas të dhënave zyrtare të Shërbimit Kombëtar të Punësimit për vitin që lamë pas, nga 37, 261 vende të lira të ofruara nga subjektet, 72% janë plotësuar, shifër kjo 8% më e ulët se një vit më parë.
Ndërsa janë 23,136 punëkërkues të papunë të punësuar nga 25,170 që janë punësuar në 2016-ën. Prej këtyre punësimeve 14,662 janë realizuar me ndërmjetësim, direkt nga zyrat e punës, 3,651me programet e nxitjes së punësimit, ndërsa 4,823 punëkërkues të papunë që e kanë gjetur vetë punën.
Në vitin 2017 ka gjithashtu një rënie të numrit të përfituesve nga skemat e mbështetjes me të ardhura, me 10 për qind, krahasuar me një vit më parë dhe punësimi për këtë kategori ka rezultuar i vështirë.
Nëse në 2016-ën u ndërmjetësuan për punë 3477 punëkërkues të papunë nga këto kategori, në 2017-ën shifra ka shkuar në 2486, nga 4 mijë që ka qenë objektivit vjetor.
