Ilir Kulla, i njohur si një nga këshilltarët më të afërt dhe më me ndikim pranë Presidentit të Republikës Ilir Meta, me anë të një statusi në facebook-un e tij, paralajmëron ditë të errëta për njerëzimin, pas vrasjes së gjeneralit Qassem Soleimani.
Vrasja e njeriut të dytë më të rëndësishëm të Iranit, u realizua në 2 janar viti, nga forcat amerikane me urdhër personal të Presidentit Donald Trump. Kjo ngjarje ka provokuar reagime të shumta në të gjithë botën, duke rritur tensionet në Lindjen e Mesme.
Këshilltari i Presidentit të Shqipërisë shkruan: “Mbani mend 2 janarin e 2020 si 28 Qershorin 1914”. Po çka ndodhur 106 vjet më parë dhe çlidhje ka ajo datë me zhvillimet e sotme globale? Ilir Kulla i referohet me sa duket me anë të kësaj date, vrasjes në Sarajevë të Princit Ferdinand, trashëgimtarit të fronit të Perandorisë Austro- Hungareze. Kjo ngjarje njihet në histori si shkaku që nxiti fillimin e Luftës së Parë Botërore.
Për rrjedhojë, nisura nga paralelizmi i këshilltarit të Kreut të Shtetit, të gjithë duhet ta mbajmë mend vrasjen e general Soleimanit, pasi ajo mund të shpërbejë si shkak për fillimin e Luftës Tretë Botërore.
Presidenti i Republikës Ilir Meta dhe bashkëshortja e tij, Kryetarja e LSI Monika Kryemadhi, janë të vetmit nga elita politike e Tiranës, që nuk janë prononcuar publikisht rreth vendimit të Presidentit të SHBA Donald Trump, për vrasjen e gjeneralit Iranian Qassem Soleimanit. Qëndrimi i këshilltarit Ilir Kulla, mund të shërbejë si një pasqyrë për të parë në këtë rast, edhe qëndrimin e Ilir Metës rreth kësaj ngjarje.
Kujtojmë se në tetor 2019, drejtori i Policisë së Shtetit Ardi Veliu në një konferencë shtypi, njoftoi se Shqipëria kishte shmangur një atentat terrorist nga një celulë iraniane, ku u përmend edhe emri i gjeneral Soleimanit. Atentati u tha se ishte planifikuar të realizohej ditën e Sulltan Novruzit (mars 2018) në Kryegjyshatën Botërore Bektashiane, në Tiranë.
Nga viti 2014, në koordinim me OKB dhe SHBA, Shqipëria ka pritur një numër anëtarësh të MEK-ut, një organizatë që e sheh veten si opozita në mërgim dhe alternativë ndaj regjimit Iranian. Regjimi iranian e sheh atë si kërcënim serioz për mbijetesën e tij. MEK-u është një shënjestër kyçe për forcat e sigurisë iraniane, të cilat tentojnë të sulmojnë anëtarët e organizatës kudo ku ata mund të jetojnë dhe operojnë jashtë Iranit.
Alpenews.al
