Shefi i Emergjencave Civile Shemsi Prençi deklaroi nga Ura e Mifolit se situata në Vjosë paraqitet në pikën kritike, por nuk ka çarje të argjinaturave dhe vend për panik, pasi niveli i ujit do të bjerë. Ai theksoi se nga Kosova kanë ardhur në ndihmë 6 ekipe për të ndihmuar në evakuime.
“Situata paraqitet në pikën kritike të Vjosës. Nga shërbimet meteorologjike kemi pasur informacion korrekt në kohë reale. Prurjet maksimale kanë qenë mbrëmë gjatë natës. Niveli i prurjeve është më i madh se në 2015, nuk kemi shqyerje të argjinaturave.
Deti nuk ka pasur dallg si në 2015 dhe tërheqja e ujrave të Vjosës është me intensitet, pasditen e sotme do të kemi një rënie të nivelit të ujit. Në terren janë rreth 2500 trupa, nga policia, FA, zjarrfikësja dhe bashkitë. Kanë ardhur edhe 6 ekipe evakuimi nga Kosova.
Evakuimet vijojnë prej tre ditësh, edhe të detyrueshme, tani po po bëhen evakuime të tjera. 20 familje janë evakuuar me forcë. Ndërsa në orët në vazhdim nuk ka vend për panik” deklaroi ai.
