Ervin Salianji dhe Ralf Gjoni, sipas disa mediave, janë përplasur fizikisht me njëri-tjetrin pas përfundimit të emisionit “Open” në Top Channel.
Raportohet se pas emisionit, Gjoni i ka kërkuar llogari Salianjit pse i ka përmendur familjen dhe ky i fundit e ka qëlluar me pëllëmbë atë.
Pas kësaj, kanë ndërhyrë punonjësit e Top Channel për t’i ndarë.
Gjithçka nisi pasi ish-deputeti i PD-së, Salianji u shpreh në emision se deputetët e “opozitës së re”, nuk i hyjnë në punë as dreqit, por janë futur në parlament për të marrë një rrogë”.
Nga ana tjetër Gjoni është përgjigjur se mënyra se si ish-deputetët duan t’i zgjidhin gjërat është me dhunë, duke kujtuar këtu edhe rastin që vetë atij i hodhën bojë, shumë pranë banesës së tij.
“Mos guxo më të ma kujtosh më atë moment. Unë kam familje, turp të kesh!
Nuk bëhet fjalë për bojën, por është agresion fizik ndaj familjes sime nga njerëz që zënë pritë në hyrjen e banesës sime.
Mos guxo më Salianji të më përdorësh atë episod kriminal për të më kërcënuar”, tha Gjoni.
“Unë kam turp që dal në të njëjtin ekran me ty, por çfarë të bëj! Ti je budalla! Ti je aty për të marrë një rrogë dhe kaq. Mos ma trash zërin mua se e ke të hollë”, tha Salianji.
