Pas largimit të ministrit të Jashtëm grek, Nikos Kotzias, pas sherrit në kabinet me ministrin e Mbrojtjes Kamenos, mediat greke shkruajnë lidhur me një abuzim në përdorimin e të ashtuquajturit fondi sekret i ministrisë së Jashtme të shtetit fqinj.
Një debat të madh politik kanë shkaktuar fondet sekretet të ministrisë së Jashtme, të cilën opozita e ka lidhur me dorëzimin e papritur të postit nga ana e Nikos Kotzias, shkruajnë mediat greke.
Mediat greke, i referohen një dosjeje të hapur me datën 10 tetor, e cila thuhet se përmbante tre kode, për një fond prej 1 milion eurosh, shumë e shpenzuar për financime dhe ndihma të dhëna për media në Shqipëri dhe në Maqedoni.
“Kodi i parë ishte për para që iu dhanë mediave në Shqipëri, i dytë për media në Shkup dhe i treti për mbështetjen e kishave ortodokse. Sqarimi që u dha për dy kodet e para, ishte se janë përdorur me qëllim që të publikohen shkrime pozitive për Greqinë dhe të lobohet me gazetarë e drejtues mediash në dy vendet fqinje në dobi të interesave të Greqisë”- shkruajnë mediat greke.
Çështja shkaktoi debat në Kuvend, për të cilën kryetari i parlamentit Nikos Voutis, pranoi se e gjithë kjo nuk mund të mos shkaktojë indinjate, pasi sipas tij, “krijon pikëpyetje serioze mbi qëllimet dhe synimet e politikanëve dhe mediave që i riprodhojnë këto lloj ‘lajmesh’.”
Demokracia e Re ka kërkuar llogari dhe detaje për gjithë transaksionet e bëra, në mënyrë që të bëhet transparencë.