Po ta shihje opozitën në seancën e sotme të Kuvendit tek rrinte ashtu urtë e butë, me zë të fikur e fjalë të tretur, duke qëndruar vetëm disa minuta në sallë për tu larguar prej aty “sepse kishte hyrë Saimir Tahiri?!) atëherë e kupton edhe qëllimin e vërtetë që fshihej pas gjithë atij tensioni artificial që u mundua të krijonte në seancat e kaluara.
Mjafton të analizosh seancën e shkuar dhe sjelljet e opozitës në seancën e sotme, ndërmjet të cilave ishte vendimi historik i marjes së rekomandimit nga Komisioni Europian për hapjen e negociatave mes Shqipërisë dhe BE, dhe e kupton se ku paskërkësh qenë edhe qëllimi i vërtetë.
Javën e kaluar mbi Kryeministrin, ministrat e kabinetit të tij qeveritar dhe spikerin e Kuvendit u hodhën topa letre, ujë, vezë e miell, televizora dhe mikrofona. U bënë betime e përbetime se Kryeministri nuk do flasi më në asnjë seancë tjetër derisa ti kërkonte falje shqiptarëve se i kishte fyer rëndë duke thënë diçka që vetëm opozita e kishte kuptuar ashtu siç donin ta interpretonin.
Por pasi kaloi një javë Kryeministri foli, por opozita nuk ishte në sallë. U largua urtë e butë, duke lënë pas veç një deklaratë. Ata e kishin kuptuar vendimin historik të arritur nga Shqipëria si një kusht që të largohet Kryeministri Rama që e ka udhëhequr në pesë vitet e fundit procesin që të mbërrinim tek kjo ditë!
Por ska gjë. Tashmë shqiptarët u mësuan me opozitën tonë e cila tjetër gjë thotë, ndryshe vepron dhe një krejt tjetër gjë ka në fakt ndërmend. Tjetër gjë thanë më 18 dhjetor 2017 kur gjuajtën me çizme dhe tjetërkund e paskërshin patur hallin. Tjetër gjë thanë pas protestës së kuksianëve në Kalimash, kur deklaruan se do fillonin mosbindjen civile dhe tjetër gjë synonin. Ashtu si edhe seancën e kaluar.
Pra, për opozitën halli real nuk paska qenë as taksa e rrugës, as lirimi i 11 kuksianëve, as TVSH e biznesit të vogël, as ofendimi i rëndë që u kishte pas bërë Kryeministri kur recitoi në foltoren e Parlamentit e as ndonjë sebep tjetër që artikulohej si hall, si kauzë apo si aksion politik.
U desh kjo seancë e sotme, që ta thonin më në fund realisht se çfarë donin. Por duke mos e thënë dot si dëshirë të tyre të vetme, e shitën si kushtin e vetëm të BE për Shqipërinë: Të largohet Edi Rama. E në vend të tij të vijë e të qeverisin Lulzim Basha dhe Monika Kryemadhi. Dakord.
Demokracia është rrotacion dhe alternativë. Pas tre vjetësh, në qershorin e 2021 kur Shqipëria të shkojë në zgjedhjet parlamentare të radhës, nëse shqiptarët do i dëgjojnë, pse jo edhe mund të ndodhë. Deri atëherë duhet të kalojnë edhe nja 150 të enjte të tjera.
Përgatiti: Alpenews.al
