Sot në mbrëmje luhet ndeshja midis Partizanit të Beogradit dhe skuadrës shqiptare të Skëndërbeut, e vlefshme për grupet e Europa League. Korçarët kanë mbërritur dje në Beograd nën forca të shumta sigurie.
Vladimir Stojkoviç, portieri i Partizanit të Beogradit ka dalë para mediave, me qëllimin e vetëm që t’i bëjë apel tifozëve serbë, veçanërisht grupimit të njohur “Grobari”. Sipas portierit, nesër tifozët nuk duhet të bëjnë asnjë thirrje kundër shqiptarëve.
“Mesazhi është i qartë: ne duhet të organizojmë mbi të gjitha një ndeshje sa më normale. Duhet të vlerësojmë se si shqiptarët silleshin ndaj nesh në ndeshjen që luajtëm dy javë më parë” – u shpreh portieri.
“Ne nuk kemi përjetuar asnjë moment të pakëndshëm në Shqipëri. Unë do t’u kërkoj të gjithë tifozëve të mbushin stadiumin dhe të mbështesin ekipin brenda normave. Nuk ka pse të na lëndoni, sepse Partizani është mbi të gjitha. Çdo mosbindje do të dënohet nga UEFA. Duhet të gëzohemi të gjithë bashkë për fitoren, por tifozët të jenë të përmbajtur. Nuk kanë punë me kundërshtarin. Jemi nën vëzhgim për këtë takim dhe rrezikojmë shumë”, – theksoi më tej portieri serb.