Një ndër organizatat jo-fitimprurëse më të mëdha dhe më të njohura në vend, Down Syndrome Albania, ka hapur dyert e një shtëpize në tregun e Krishtlindjeve në sheshin Skënderbej.
‘Shtëpiza e Lepurushëve’ e mbyllur nga Policia Tatimore mëngjesin e sotëm në Sheshin Skëndërbej
Quhet ‘Shtëpiza e Lepurushëve‘ dhe shet produkte të ndryshme me qëllim mbledhjen e fondeve për vazhdimin e veprimtarisë.
Themeluesja e organizatës, Emanuela Zaimi, postoi orët e para të së hënës këtë status në profilin e saj në Facebook:
“Miq, Shtëpizën e Lepurushëve e kemi mbyllur me urdhër të tatimeve deri sa të dalë NIPT-i sekondar. Me të drejtë deri këtu. Çudia për mua qëndron në faktin se si ky shtet pretendon që një OJF të blejë një kasë të re sa herë që ka veprimtari ekonomike. I bie që lekët e donatorëve apo fondet që ngremë t’i bëjmë kasa. Për më tepër që procedurat janë super të zgjatura në kohë.
Tatimet na janë qepur dhe tek dyqani i luleve. Kanë ardhur herë vetëm muajin e shkuar. Nuk e di ç‘kërkojnë, por ma kanë bërë nervin kaçurrel. Na rroftë dhe pseudo-ligji për ndërmarrjet sociale i cili një aktivitet si i yni nuk e njeh si sipërmarrje sociale. Dëgjoj që në janar do të na vënë dhe TVSH. Hallall plako! I meritojmë të tëra!”
Mëngjesin e të hënës, shtëpiza u zgjua me shiritin e tatimeve që nënkupton se aktiviteti përgjegjës është nën hetim tatimor. Veprim ky, që më tepër se pengon aktivitetin dhe mbledhjen e fondeve, rrënon reputacionin e një organizate që lëvron me donacione.
“Prej 6 vitesh, më së tepërmi jam munduar të siguroj transparencë për organizatën që kam ngritur me shumë mund. Transparenca mbi aktivitetet, fondet e mbledhura jo pak herë më është kthyer në bumerang. Shumë mendojnë që ne kemi fonde shumë dhe që mbështetjen e kemi të garantuar.
T’i vësh një shirit të tillë një shtëpize bamirësie të një fondacioni, që të më falni për modestinë, është model, është e turpshme.
Sapo më hodhët në tokë një mund e një imazh që mezi e kam ngritur në kurriz jo pak herë dhe të fëmijëve të mi. Ne jemi organizata që deklarojmë ç’do punonjës me pagën reale e s’jemi vonuar asnjë ditë në pagesat e sigurimeve. Ne jemi organizata që në faqe të internetit ka bilancet e çdo viti. Një bilanc, jo dy e tre. Biznesi i madh nuk e bën këtë, ne e bëjmë. E meqë e bëjmë, na vihet një shirit për hetim tatimor.
Po mbledhim fonde për shërbimet e fëmijëve tanë, ato shërbime që ti shtet nuk i ofron e as nuk duket se ke në plan t’i ofrosh.”
‘Shtëpiza e Lepurushëve‘ u rihap mbrëmjen e djeshme.
Saga e tatimeve nisi, kulmoi dhe përfundoi brenda një dite të vetme. Si gjithë shtëpizat e tjera në shesh apo tek Pazari i Ri, ishte e arsyeshme pajisja me një NIPT sekondar, por kasa jo.
Bëhet fjalë për një organizatë jo-fitimprurëse e para, s’mund të shpenzojnë aty-këtu me kasa. Dhe e dyta mund të operojnë me një bllok dëftesash tatimore, si thuajse çdo biznes rrotull tyre.
Mund të dhuroni diçka në faqen e tyre të web-it, ose të blini diçka në Shtëpizën e Lepurushëve.
Të gjitha të ardhurat shkojnë në ndihmë të fëmijëve me sindromën Down./ anabel
