Plisi i bardhë, simboli mijëvjeçar që ka sfiduar kohën dhe ka shoqëruar brezat e shqiptarëve si një emblemë e pathyeshme e identitetit, sot po kërkon vëmendjen e botës.
Përmes një peticioni të nisur online, mijëra qytetarë po i bëjnë thirrje UNESCO-s që ky artefakt unik të përfshihet në listën e Trashëgimisë Kulturore Jomateriale të Njerëzimit.
Ky kapuç prej leshi të bardhë, i punuar me dorë dhe me mjeshtëri, nuk është thjesht një element veshjeje, por një dëshmi e gjallë e historisë, traditës dhe qëndrueshmërisë tonë kombëtare.
Plisi, kapela autoktone, është veshur nga shqiptarët prej shekujsh. Në krahinat e ndryshme ai ka emërtime të ndryshme, si qeleshe, kësulë, qylaf; por pavarësisht emrit, ai është simbol i identitetit kombëtar shqiptar.
Në një kohë kur globalizimi rrezikon të zbehtë identitetet e veçanta, kjo nismë synon që Plisi të mos mbetet thjesht një kujtim në raftet e muzeve apo në fotot e vjetra, por të njihet zyrtarisht si një pasuri globale. Njohja nga UNESCO jo vetëm që do të mbronte teknikën e rrallë të punimit të tij, por do t’i jepte një hov të ri turizmit kulturor në trojet shqiptare.
Thirrja përmes këtij peticioni është e qartë: bashkimi i firmave është një zë më shumë për të siguruar që trashëgimia jonë të mbetet e gjallë dhe e nderuar në sytë e botës, duke ruajtur lidhjen e shenjtë mes të shkuarës dhe të ardhmes sonë.
Deri më tani, peticioni, edhe pse në ditët e tij të para, ka arritur të marrë rreth 8 mijë firma, numër që ndryshon vazhdimisht pasi interesi është i lartë.
