Hartim i projekt preventivave të zbatimit për disa Spitale Rajonale dhe Bashkiake do ti kushtojë buxhetit të shtetit mbi 40 milionë lek. Ky fond do të përdoret për disa spitale rajonale e bashkiake si dhe për institucione shëndetësore në varësi të Ministrisë së Shëndetësisë. Konkretisht spitalet e Beratit, Gjirokastrës, Lezhës, Matit dhe Pogradecit do të përfitojnë nga ky projekt me vlerë maksimale 34.6 milionë lekë me TVSH.
Ndërsa institucionet si Qendra Kombëtare e Transfuzionit të Gjakut si dhe Qendra Kombëtare e Mirërritjes, Zhvillimit dhe Rehabilitimit të Fëmijëve do të shpenzojnë rreth 6.6 milionë lekë për këtë projekt. Objektivi i Projektit është të kontribuojë për përmirësimin e efikasitetit të kujdesit shëndetësor në spitalet e përzgjedhura, të përmirësojë manaxhimin e informacionit në sistemin shëndetësor dhe të rrisë aksesin financiar tek shërbimet shëndetësore.
Shërbimet që kërkohen të kryhen kanë të bëjnë me përmirësimin e infrastrukturës spitalore ku përfshihen punime përmirësimi, mobilimi të godinave. Në këtë kuadër strukturat ekzistuese do t’i nënshtrohen përmirësimeve, rinovimeve dhe zgjerimit që do të bëjnë të mundur modernizimin dhe përmirësimin e ofrimit të shërbimit. Objektivat specifike të këtij projekti janë që të bëhet vlerësimi teknik-ekonomik i ndërtesave ekzistuese, të studiohet projektimit inxhinierik, si dhe të përgatitet harta e mobilimit për zonat e përcaktuar.
