Një 32 vjeçar mbeti i plagosur në Malësi të Madhe një ditë më parë. Ngjarja ndodhi në fshatin Kamicë. I plagosuri është shtetasi Y.B, 32 vjeç. Sipas policisë së Shkodrës 32 vjeçari që nga dita e djeshme ndodhet jashtë rrezikut për jetën. Menjëherë në vendngjarje ka mbërritur një ambulancë e spitalit rajonal të Shkodrës duke bërë të mundur transportimin e të plagosurit. Policia vendore e Shkodrës në njoftimin e saj bëri të ditur se autor të plagosjes janë dy shtetasit L.H 42 vjeç dhe L.H 48 vjeç, vëllezër. Sipas burimeve policore në Malësinë e Madhe konflikti mes këtyre personave ka ardhur për shkak të peshkimit në liqenin e Shkodrës.
Dy vëllezërit kanë debatuar me 32 vjeçarin duke i thënë se përse je futur për të peshkuar me grep tek pjesa jonë. Për këtë çështje ka nisur debati mes tyre duke u kthyer në konflikt që përfundoi me plagosjen e 32 vjeçarit Y.B. I plagosuri por edhe dy vëllezërit të cilët jetojnë në afërsi me njëri-tjetrin prej kohësh peshkojnë me grep në liqenin e Shkodrës. Sipas burimeve edhe më përpara kanë patur debate për këtë problem por kësaj here ka shkuar edhe më tej.
Kamica është një fshat që shtrihet në brigjet e liqenit të Shkodrës dhe pjesa më e madhe e banorëve aty punojnë dhe mbajnë familjet përmes peshkimit. Forcat e policisë janë vënë në kërkim të dy vëllezërve teksa po punohet për gjetjen dhe më pas kapjen e tyre. Shtetasi Y.B vazhdon që të jetë në spitalin rajonal të Shkodrës nën kujdesin e mjekëve edhe pse është jashtë rrezikut për jetën. Grupi hetimor pas veprimeve në vendngjarje po punon për sqarimin e plotë të rrethanave të ngjarjes.
