Gjatë një operacioni të zhvilluar në Mamurras, policia ka bërë të mundur arrestimin e dy vëllezërve, Arben e Astrit Seferi, me origjinë nga Puka.
Gjithashtu në pranga ka përfunduar edhe shtetasi Viktor Gjoka, i cili ishte së bashku me dy vëllezërit.
Mësohet se në momentin e arrestimit ka pasur edhe të shtëna, pasi një prej vëllezërve ka hapur zjarr ndaj policisë.
Fatmirësisht nuk ka pasur të lënduar nga shkëmbimi i zjarrit, ndërkohë që në fund “blutë” kanë arritur të neutralizojnë dhe arrestojnë dy vëllezërit dhe personin e tretë.
Vëllezërit Seferi akuzohen për plagosjen e 4 personave në Laprakë në vitin 2017, pasi hapën zjarr ndaj një lokali.
Shënjestër e sulmit me armë zjarri ishte pronari i lokalit, Elion Leka, i cili arriti t’i shpëtojë vrasjes, duke u plagosur me një plumb në shpatull.
Bashkë me të të plagosur mbetën tre persona të tjerë, Avni Biber, Bujar Mrisha dhe Bledar Gusturama, të cilët ishin klientë të rastit në lokal dhe nuk ishin në dijeni të konfliktit që vëllezërit Seferi kishin me Elion Lekën.
