Sekretari amerikan i Shtetit, Marco Rubio, njoftoi sot miratimin e një përjashtimi që do të lejojë vazhdimin e ndihmës së huaj humanitare që shpëton jetë gjatë periudhës së rishikimit të ndihmës së jashtme nga administrata e Presidentit Trump.
Kjo masë vjen si pjesë e Urdhrit Ekzekutiv të Presidentit për Rishikimin dhe Riorientimin e Ndihmës së Huaj të Shteteve të Bashkuara.Rubio theksoi se implementuesit e programeve ekzistuese të ndihmës humanitare që shpëtojnë jetë janë të autorizuar të vazhdojnë ose të rifillojnë aktivitetet e tyre nëse kanë ndaluar, në përputhje me udhëzimet e përcaktuara në këtë përjashtim.
Sidoqoftë, ai sqaroi se ky rifillim është i përkohshëm dhe se, përveç rasteve të kufizuara, nuk do të lejohen kontrata të reja.
“Kjo vendimmarrje ka si synim të sigurojë që ndihma humanitare të vijojë për ata që kanë nevojë, ndërsa administrata vazhdon të rishikojë dhe riorientojë ndihmën e huaj për të maksimizuar efektivitetin e saj. Ndihma e huaj është një komponent i rëndësishëm për të mbështetur vendet që përballen me kriza humanitare dhe sfida të tjera”, thuhet në njoftimin e Sekretarit të Shtetit.
