Ti mund të lodhesh me orë të tëra mbi tenxhere e tiganë, të realizosh receta me pesë yje, por fëmijët nuk është se duan t’ia dinë shumë. Nëse gjyshja u ka bërë një herë petulla dhe u kanë pëlqyer, duan petulla dhe pikë. Sot mëngjes petullash për Jonidën dhe Danin. Edhe pse Jonida e ka thënë shpesh se nuk merr dhjetë në kuzhinë, sot i është përveshur brumit dhe ka skuqur petulla për të birin. Dhe pyetjes 1 milion dollarëshe “mama, të pëlqyen petullat?”, Dani i përgjigjet “po”. Ia dola, shkruan Jonida, si të kishte ngjitur Everestin.