Pavarësisht shkarkimit nga detyra ditën e djeshme, ish-drejtuesi i prokurorisë Dritan Gina ka shkuar në zyrë për të vijuar punën. Por përpos tij në Elbasan ka arritur edhe prokurori i ri i emëruar Ardjan Nezha.
Mëngjesin e sotëm drejtuesi i ri ka kërkuar të bisedojë kokë më kokë me Drita Ginën, kryeprokurorin e Elbasanit, të shkarkuar nga detyra, për t’i dhënë fund situatës së krijuar në këtë institucion.
Prokurori Gina gjatë një konference shtypi dje deklaroi se nuk largohet nga zyra pasi vendimi i shkarkimit të tij është i paligjshëm. Nezha nga ana tjetër u prezantua zyrtarisht në orën 15.00 para stafit të prokurorisë së Elbasanit.
Tashmë pritet nëse në përfundim të takimit Gina do të largohet apo do të vijojë që t’i qëndrojë deklaratës së djeshme se kundërshton vendimin e shkarkimit nga kryeprokurorja Arta Marku. Dje Marku firmosi disa lëvizje në qarqe, por drejtuesi i Elbasanit dhe i Durrësit e kundërshtuan.