Kryeministri Edi Rama njofton nëpërmjet një postimi në Facebook se mbi 100 efektivë nga Forca Tokësore dhe Baza e Mbështetjes për Emergjencat Civile, mjete të larta, mjete lundrimi dhe pajisje të posaçme për situata përmbytje i janë shtuar skuadrës së efektivëve në Shkodër për të shtuar forcën dhe shpejtësinë e reagimit në çdo situatë problematike që reshjet mund të sjellin gjatë natës e në vijim.
Vendi ynë është përfshirë nga stuhia e shiut që prej mbrëmjes së djeshme.
Shiu i vrullshëm ka përmbytur tokat në zonë, ndërsa dy familje u evakuuan nga shtëpitë e tyre.
Evakuimi i dy familjeve në lagjen Ajasem, në Shkodër është bërë nga grupi i evakuim-shpëtimit dhe grupi alpin i FNSH Shkodër. Njëri prej pjesëtarëve të familjeve të izoluara ishte i sëmurë dhe kishte nevojë për ndihmë mjekësore, njofton Policia.
