Ish-numri dy i Partisë Demokratike, Jozefina Topalli, duke komentuar vendimin e kryedemokratit Basha për largimin e Sali Berishës nga grupi parlamentar i PD-së thotë se ky ishte turpi më i madh që mund të ndodhte në këtë parti.
Në një intervistë për Ora News mer gazetarin Arnold Kariqi, Topalli thotë se përjashtimi i Berishës shënoi kulmin e paligjshmërisë së Bashës si drejtues i PD.
Për Topallin ky është një momnent për të hapur një kapitull të ri dhe për ta rikthyer PD te vlerat e saj mbi të cilat është themeluar si parti.
Topalli:Është gjëja më e turpshme që mund të ndodhë. Gjatë gjithë jetës së tij ka vepruar me vendime personale, në anësimin dhe mosnjohjen e forumeve të vendimmarrjes, mosnjohjen e statutit, vendosjen e vetes së tij mbi ligjin për çdo gjë që ka bërë që kur është ulur në karrigen e kryetarit të partisë dhe kjo e fundit ishte gjëja më e paimagjinueshme që mund të mendonte njeriu.
Të përjashtosh ish-kreun e PD, themeluesin e PD, ish-presidentin, ish-kryeministrin, njeriun që ka bërë opozitën më të fortë gjatë kësaj periudhëe pa mbledhur forumet dhe pa pasur një vendimmarrje të tyre, thjesht nje deklaratë të personit të tij, është e shëmtuar, antiligjore, nul në gjithë gjënë e vet. Ka sjellë një moment ku çdo gjë ka arritur pikën e saturimit brenda asaj force që prej vitesh jetonte njëfarë deligjitimimi që funksiononte në një vendimmarrje personale apo familjare të Lulzim Bashës.
Sigurisht do të vinte një moment ku gota do të derdhej, do hapej një kapitull i ri për të larguar njeriun që ka marrë peng opozitën shqiptare. Njeriu që është dështaku më i madh i historisë politike të këtyre 30 viteve.
Ish-nënkryetarja e PD-së pranon se PD është në një udhëkryq të madh, por si çdo sfidë tjetër edhe kjo sfidë mund të kthehet në një oportunitet të madh për ta kthyer këtë parti në një alternativë të shqiptarëve për të larguar nga pushteti Edi Ramën.
Topalli: Nuk kam qenë kurrë jashtë PD edhe kur formalisht mund të dukej. Është një moment i një udhëkryqi të madh të opozitës në terësi dhe PD në veçanti, një krizë që po kthehet në një sfidë dhe si çdo sfidë ka mundësi të kthehet në një oportunitet të madh për të bërë një kthesë të madhe, së pari për të rikthyer ca vlera dhe parime që përbënin thelbin e PD, kthimin e demokracisë brenda kësaj force demokratike dhe së dyti duke bërë disa zgjidhje të nevojshme për tu kthyer në një alternativë për të larguar nga pusheti Edi Ramën dhe për të filluar një qeverisje të re për të nxjerrë vendin nga kriza, varfëria, borxhet, pasiguria e tj.
