Në vetëm dy orë e gjysmë kanë ndodhur tre aksidente në Shqipëri, ku kanë ndërruar jetën dy persona dhe janë plagosur disa të tjerë.
I pari u rregjistrua në Bulqizë, ku një motorr u përplas me një shtyllë elektrike.
Si pasojë mbeti i plagosur 30-vjeçari me iniciale B.LL, i cili u dërgua me helikopter drejt Spitalit të Traumës.
Mësohet se tashmë ai ndodhet në gjendje të rëndë.
Aksidenti i dytë ka ndodhur në fshatin Jubë të Durrësit, ku ka mbetur i vdekur një i mitur 8-vjeçar.
Mësohet se një 66-vjeçar me iniciale Q.N ka përplasur me furgon të miturin, i cili ka qenë duke lëvizur me biçikletë.
Ndërkohë policia e ka arrestuar në flagrancë dhe e ka shoqëruar menjëherë në Komisariat.
Aksidenti tjetër është rregjistruar në afërsi të fshatit Krutje, në aksin Lushnje-Fier, ku autoambulanca është përplasur me një mjet tip ‘Benz’.
Bëhet me dije se ka mbetur i vdekur pacienti Medi Marku, 62 vjeç dhe të plagosur djali i tij dhe drejtuesi i autombulancës shtetasi N.H, 55 vjeç, të cilët ndodhen në spitalin e Lushnjes nën kujdesin e mjekëve.
