” Integrimi Europian duhet të jetë mbi çdo axhendë politike“, ky ka qenë mesazhi i kryetares së Lëvizjes Socialiste për Integrim, Monika Kryemadhi gjatë një takimi në seli me ambasadoren e Kroacisë, Bujas Juraga.
Takimi u zhvillua me rastin e përfundimit të mandatit të zonjës Juraga në Tiranë. Në bisedë me ambasadoren kroate Bujas Juraga, Monika Kryemadhi u shpreh se Shqipëria në rrugën e saj drejt integrimit europian ka si shembull Kroacinë e cila u anëtarësua në familjen europiane me shpejtësi.
“Siç Kroacia gjeti rrugën e duhur dhe u anëtarësua me shpejtësi në BE, ashtu dhe ne duhet të ndjekim shembullin e saj, ku axhenda për integrimin europian duhet të jetë mbi çdo axhendë politike”, u shpreh Kryemadhi.
Kujtojmë se ndryshe nga PD, LSI është treguar e gatshme që të hyjë në zgjedhje me Edi Ramën kryeministër. Po ashtu nuk kanë përjashtuar edhe negociata të mundshme me PS për të zgjidhur krizën.
