Kur Rusia nisi pushtimin e saj në Ukrainë, ajo që ra në sy ishte përdorimi i simbolit “Z” e cila ishte e vendosur në të gjitha automjetet luftarake, dhe që do të thotë fitore në rusisht.
Ministri i Jashtëm Ukrainas, Dmytro Kuleba u ka bërë thirrje vendeve Perëndimore të kriminalizojnë përdorimin e këtij simboli, duke e cilësuar atë si një mbështetje për luftën. Nëpërmjet një postimi në rrjetet sociale, ministri, i cili dje foli për shpresën e tij për një armëpushim në bisedimet e ardhshme të paqes me Rusinë, tha se “mbështetja publike e kësaj barbarie duhet të ndalohet”.
Unë u bëj thirrje të gjitha shteteve të kriminalizojnë përdorimin e simbolit “Z” si një mënyrë për të mbështetur publikisht luftën e agresionit të Rusisë kundër Ukrainës. Z do të thotë krimet ruse të luftës, qytete të bombarduara, mijëra ukrainas të vrarë. Mbështetja publike për këtë barbarizëm duhet të ndalet“, shkruan Kuleba në Twitter.
Dje Ministria e Brendshme e Gjermanisë tha se personat që shfaqin simbolin “Z” në mbështetje të pushtimit të Rusisë mund të ndiqen penalisht në vend. Autoritetet në Berlin, Bavari dhe Saksoni kanë thënë se do të ndëshkojnë akte të tilla.
