Ndërmjet viteve 2000 dhe 2017 është vënë re një rritje e konsiderueshme e përdorimit të internetit në Ballkanin Perëndimor me një numër përdoruesish të internetit që shkon nga 66% në 81% të popullsisë.
Sipas të dhënave të Këshillit të Bashkëpunimit Rajonal (RCC) Shqipëria ka numrin më të ulët të përdoruesve të internetit në raport me popullsinë ndër vendet e tjera të Ballkanin me vetëm 66% të popullsisë që e përdorin internetin. Vitin e kaluar në Bosnjë 81 për qind e popullsisë ishin përdorues të internetit, në Kosovë 80 % e popullsisë përdoren internetin, në Maqedoni 76 %, në Serbi 72% dhe në Malin e Zi 70%.
Studimi i RCC-së evidentoi se, Shqipëria nuk ka strategji të plotë në sigurinë kibernetike, megjithatë dokumenti për sigurinë kibernetike 1025-2017 e zëvendëson mungesën e saj.
Në strukturat e policisë së Shtetit dhe në prokurorinë e përgjithshme funksionojnë njësi të posaçme për krimin kibernetik.
Sipas vlerësimit të BE-se në kapitujt 10 dhe 24 Shqipëria është pak e përgatitur në sigurinë e informacioneve, ndërsa ka pasur përparime përsa i përket planit të veprimit për axhendën digjitale dhe shërbimeve qeveritare elektronike.
Pjesa më e madhe e krimeve kibernetike lidhen me mashtrimin, hakimin dhe përndjekjen në internet dhe ndërhyrjet në të dhëna.
Në rreth 70 për qind të rasteve përhapja e mesazheve ekstremiste ka ndodhur përmes komunikimit të drejtpërdrejte, ndërsa vetëm 30 % nëpërmjet internetit.
Mediat sociale nuk janë ende kanali më i rëndësishëm i përhapjes së përmbajtjes ekstremiste në Shqipëri.
Përdorimi i internetit në popullsinë e gjere është një nga treguesit e thellësisë së inovacionit dhe aftësive.
Sipas të dhënave të RCC rreth 43 për qind e popullsisë së Ballkanit është shqetësuar për keqpërdorimin e të dhënave personale dhe 42 për qind e tyre janë të shqetësuar për sigurinë e pagesave të bëra në internet, karshi 18 për qind e popullsisë që nuk ka përjetuar të tilla shqetësime.
