Instagram njoftoi se është duke testuar një përditësim të aplikacionit, që do t’u mundësonte përdoruesve që të postojnë foto edhe nga shfletuesit (Browser) e kompjuterave.
Kjo do të ishte hera e parë që ky aplikacion do të lejonte një veprim të tillë. Aktualisht, postimi i fotove dhe videove është ekskluzivitet i aplikacionit dhe hapja e rrjetit social nga një shfletues mund të shfrytëzohet vetëm për veprime bazë, si të shikosh postën e mesazheve, apo postimet e personave që ndjek dhe sugjerimet.
“E dimë që shumë njerëz hyjnë në Instagram përmes kompjuterave të tyre dhe ne për të përmirësuar këtë përvojë po testojmë mundësinë për të krijuar postime duke përdorur shfletuesit e kompjuterave”, tha një zëdhënës i kompanisë.
Kompania thotë se mes shfletuesve dhe aplikacionit nuk do të ketë shumë ndryshime te mënyra se si postohet. Do të mundësohte ngarkimi i fotove të shumëfishta, korrigjimi i tyre, vendosja e filtrave. Për shumë kritikë, ky vendim tregon se Instagram po bëhet gjithnjë e më i ngjashëm me Facebook dhe i etur për të fituar sa më shumë para.
