Aleatët e Partisë Demokratike nuk e fshehin shqetësimin për një marrëveshje të dytë Rama-Basha. Të djegur nga eksperienca e paktit të vitit 2017, kërkojnë që këtë herë negociatat të bëhen në dritën e diellit.
Agron Duka:
“Nuk jam dakord për një marrëveshje individuale Rama-Basha, sepse duket një marrëveshje pazaresh. Shqipëria nuk ka eksperience pozitive nga marrëveshjet individuale, edhe ajo e vitit 2017 nuk zgjidhi gjë.
Unë jam për zgjedhje të qëndrueshme dhe ato arrihen kur bëhen pozitë-opozitë për probleme thelbësore që ka politika dhe shoqëria shqiptare”, tha kryetari i Partisë Agrare Ambientaliste.
Dashamir Shehi:
“Sigurisht që nuk do të bëhet një marrëveshje gjysmë okulte. Domethënë që na ngopën me lugë bosh, kjo është frika opozitare. Duhet një marrëveshje transparente, në sy të publikut.
Çfarë ka kërkuar opozita, deri ku mbërrin, çfarë ofron maxhoranca, deri ku duron”, tha kreu i Lëvizjes për Zhvillim Kombëtar, Dashamir Shehi.
Fatmir Mediu:
Kreu i republikanëve, aleati më i afërt i PD-së insiston për një dialog me mazhorancën, të ndërmjetësuar nga ndërkombëtarët pas 30 qershorit.
Mediu është pro negociatave, por jo të drejtpërdrejta mes dy liderëve politikë, Lulzim Basha e Edi Rama.
Por duket se ata që nuk duan marrë veshje me Ramën, janë lideri i PD Lulzim Basha dhe kryetarja e LSI Monika Kryemadhi. Të dy këto të fundit janë shprehur se marrëveshje me Ramën nuk mund të ketë. Nuk dihet ende se çfarë do të ndodh me situatën politike por duket se aleatët e opozitës kërkojnë zgjidhjen e këtij ngërç të krijuar nga vetë ata.
/AlpeNews.al
