Partia Demokratike ka përgënjeshtruar deklaratën e liderit Lulzim Basha.
Ky i fundit, në një konferencë për shtyp tha se ABI Bank po ble dy banka greke NBG dhe Alpha Bank.
Por fill pas kësaj deklarate, ka reaguar “selia blu” e cila ka tërhequr pas konstatimin e kryedemokratit.
Sipas njoftimit të shpërndarë për media, PD justifikon se kreu i kësaj force politike bëri lapsus që përmendi emrin e “Alpha Bank” duke shtuar se u ngatërua me një bankë tjetër.
Ndërkohë në komunikatë nuk thuhet se me çfarë emri u ngatërrua ç’ka na bën të mendojmë se Basha bëri një deklaratë të nxituar dhe të pa bazuar në fakte konkrete.
“Duke folur për kriminalizimin e ekonomisë dhe përqëndrimin e saj në pak duar, Kryetari i Partisë Demokratike përmendi përfshirjen e sektorit bankar, nëpërmjet ABI Bank.
Zoti Basha përmendi blerjen prej ABI Bank të dy bankave greke NBG dhe Alpha Bank.
Partia Demokratike sqaron se përfshirja e Alpha Bank është një lapsus i paqëllimshëm, ngatërresë me emrin e një banke tjetër greke që media ka raportuar se është në tratativa për t’u blerë nga ABI Bank,” nënvizohet në komunikatë.
