Kryebashkiaku i Lezhës, Fran Frrokaj, pas hetimit për çështjen e pronave do të procedohet në gjendje të lirë, edhe për veprën penale “Pengimi i subjekteve zgjedhore”. Kjo si pasojë e fjalës së tij gjatë një emisioni televiziv ku ai ka deklaruar se do të pengohen subjektet zgjedhore duke përdorur pronat nën administrimin e bashkisë dhe se do të bëjë çmos që dekreti i presidentit të zbatohet. “Marrëdhënia e ngushtë” e Fran Frrokaj dhe Ilir Metës erdhi pasi gruaja e këtij të fundit, Monika u bashkua në koalicion me partinë e Frrokajt (LSI-PD).
“Dashruia dhe respekti” i shfaqur kohëve të fundit mes tyre është pak i pashpjegueshëm nëse i rikthehemi kontekstit politik. Tani gjërat kanë ndryshuar por në vitin 2015, Ilir Meta artikulonte akuza të forta në drejtim të kandidatit të Partisë Demokratike për Bashkinë e Lezhës, Fran Frrokaj. Asokohe Kryetar i Kuvendit, Ilir Meta deklaronte se Fran Frrokaj ishte zgjedhur kandidat për Bashkinë e Lezhës përmes pazareve dhe dallavereve të mëdha.
Meta replikonte me ish-deputetin e Partisë Demokratike, Aldo Bumçi se Frrokaj ka përvetësuar prona në Shënkoll të Lezhës. “Ai kandidati për Bashkinë e madhe të Lezhës ka tre mandate kryetar i Komunës së Shënkollit dhe unë nuk e njoh fare dhe nuk dua që të merrem me të. Fole për shitje dhe për blerje, sepse ashtu ta kanë shkruar fjalën. E di mirë e gjithë Partia Demokratike në Lezhë se si janë bërë pazaret për kandidatin për kryetar bashkie”, deklaronte Meta në vitin 2015 duke iu drejtuar Bumçit për kandidatin e PD në Lezhë. Lexo.al/
