Partitë pro serbe në Mal të Zi kërkojnë të zhvillojnë një peticion për anulimin e vendimit të Podgoricës për njohjen e pavarësisë së Kosovës.
Një delegacion i Partisë Demokratike Popullore, DNP kanë zhvilluar një vizitë njëditore në Kosovë me ftesë të kryetarit të Mitrovicës, Goran Rakiq.
“Delegacioni që po viziton Kosovën dhe Metohinë erdhi si përfaqësues i vërtetë i shumicës në Malin e Zi, i cili nuk e mbështet njohjen e shtetit të rremë të Kosovës. Të vetëdijshëm për faktin se kjo pikëpamje mbështetet nga të paktën 85 për qind e qytetarëve të Malit të Zi, DNPCG do të nisë javët e ardhshme mbledhjen e nënshkrimeve për një peticion që do të kërkojë anulimin e të ashtuquajturit shtetit të Kosovës“, thuhet në deklaratën e DNP-së, cituar nga gazeta malazez “Vijesti”.
Mali i Zi e ka njohur pavarësinë e Kosovës në tetor të vitit 2008, tetë muaj pas shpalljes së pavarësisë.
